Press "Enter" to skip to content

Plie u Myntri Rangbah ïa ka kamra klas ka Synod H/SS

Shillong, Nailar, 14: U Myntri Rangbah ka Jylla, u Conrad K. Sangma, mynta ka sngi balang u la plie paidbah ïa ka kamra klas bathymmai jong ka Synod Higher Secondary School, Shillong ïa kaba la bei pisa lyngba ka Asian Development Bank (ADB).
Ha kane ka sngi, la ïadonlang ruh u MLA jong ka North Shillong, u Bah Adelbert Nongrum bad ka MLA barim ka North Shillong ka Kong Roshan Warjri.
U Myntri Rangbah ha ka jingkren jong u kum u Kongsan u la pynpaw ïa ka jingkmen ban ïohi ba kane ka skul ka la lah ban pynkha ïa kane ka kamra klas ka ban pynmyntoi ïa ki khynnah skul ïa kaba la tei ha ka jinglut kaba T.3.69 klur ha kaba la pynlut ym tang shna ïa kane ka iingskul ba thymmai hynrei ban shna ruh ïa ka Computer Laboratories, ki jingbuh jingsat bad kiwei kiwei ki jingdonkam.
“Ki don bun tylli kum kine ki skul kiba la kiew shaphrang ha ka jylla lyngba ka jingpyntreikam ïa ka Human Development Programme ha kaba ka Sorkar ka la ïasoi bad ka ADB,” la ïathuh u Conrad.
U la ïathuh ba 62 tylli ki skul la shna pyndep lyngba ka jingbei pisa na ka ADB bad mynta haduh 55 tylli ki skul la pynkhreh ban shna bad ki don ruh kiba la shna. U la bynrap ruh ba saw tylli ki DIET bad ki Teachers’ Training Institutes, shiphew tylli ki Pilot Projects na ka bynta ki Science Laboratories bad shiphew tylli ki Pillot Project na ka bynta ki Computer Laboratories, ki jaka ai jinghikai ïa ki nonghikai bad ïa ki samla la leh lyngba ka Human Capital Development Programme.
“Na ka bynta jong ka Sorkar ka Human Development Programme ka dei ka jingtynjuh kaba khraw bha ha kaba ka Sorkar kan hap ban pyntyllun shakhmat ïa ka bynta kaba ar (second phase) na ka bynta kane ka prokraml,” la ïathuh u Conrad.
Shuh shuh u la ïathuh, kumba saw haduh san lang ngut ki samla kin sa rung ha ki kam pulit ha ki snem ban sa wan bad ka long kaba kongsan tam ban don ïa ka sap kaba pynthikna ba yn thaw ïa ka ïohkam ïohjam na ka bynta jong ki.
Shwa kane, u Myntri Rangbah u la plie paidbah ïa ka website jong ka skul.