Press "Enter" to skip to content

Pynher lama ka kynhun HNLC ha Jowai bad Khliehriat

Shillong, Nailar 14: Ka kynhun kiengatiar Hyn-ñiewtrep National Liberation Council (HNLC) hynne ka sngi balang, kala pynher ïa artylli ki lama jong ka kynhun ha Ri-lum Jaiñtia kum ka dak ban rakhe ïa ka jingdap 32 snem ba seng ïa ka.
Ïa kine ki lama la pynher ha Jowai bad ha Khliehriat da ki dkhot jong ka seng, ong ka kyrwoh na u Bah Saiñ kupar Nongtraw, General Secretary-cum Publicity Secretary ka kynhun bala phah hynne ka sngi.
Haba ai khublei ïa baroh ki paradoh parasnam, ki nongiarap mon sngewbha, ki bahaïing hasem jong ki dkhot baroh kiba dang don ha ka seng bad kumjuh ruh kiba la khlad noh, u Bah Saiñkupar ula ong “Ka jingkha ïa ka HNLC ka long halor ka juh ka nongrim kaba u Syiem Wickliff u ieng. La seng ruh
ïa ka HNLC ha u snem 1987 shisnem shuwa ka jingkhlaw noh jong une u Syiem ha u snem 1988”.
Kat kum ka jingon gjong u, ka seng kala lah ban pyn ieng ïa artylli ki lama kum ka dak ban pyni ba ka seng bad ka Jaidbynriew ka dang im.
“La pynkha ïaka Ri India da kita ki briew kiba lah ngiah ïaka jingshah synshar donbor ha ki dohlieh,nga tharai ka long kaba dei eh iangi ruh kum ka Seng bad ka Jaidbynriew ban ialeh pyrshah ïaka Sorkar India na ka bynta ban pyllaitluid naki jingshahteh shakhum, laka long ïaka synshar khadar,ka ïoh ka kot ne ka imlang sahlang” ula ong.
U Bah Saiñkupar u ong “Ka im ka ïap jong ka Jaidbynriew Hynñiewtrep ka shong sa tang ha artylli kiei kiei, ïa kano ka lad ngin jied, la ki khun ki hajar ka bri u Hynñiewtrep ki kwah ba ngin aiti ne ngin ïakhun.
Ka HNLC kala pynpaw ruh ïa ka jingbynniaw ba ka Jaidbynriew kam ju kham kynmaw ïa u Syiem Wickliff namar ba u dei u Syiem bym pat ïoh jingithuh na ka Sorkar India bad ong “Ka Jaidbynriew jong ngi kam dei ka Jaidbynriew kaba klet biej hynrei ka long ka Jaidbynriew kaba mutlop tasam” bad bynrap da kaba sot ïakine ki ‘tien phira uwei u riewkhraw ba ong ” Kaba suk ban kyrsiew ïaki briew kiba ïohthiah,hynrei kaba da jwat ban kyrsiew ïaki briew kiba shu leh myn ïohthiah”.
U Bah Saiñkupar u ong, ka 15 Nailar ka dei ka sngi kaba kha ïa une u Syiem,bad ka dei ruh ha kane kajuh ka sngi kaba pynkha ïaka jingialeh pyrshah ri kaba iatyngkhuh syndon bad ka sngi rakhe jinglaitluid jong ka Ri India. U ong ba dei ruh une u Syiem uba lah bet ïa u symbai jong ka mynsiem ialeh bad kumno ban ieid ïala ka jong ka Ri.
“Ka Jaidbynriew ka donhok ban tip shaphang une u Syiem, namar kano kano ka Jaidbyn riew kaba tip ïala ka jong ka Histori ka dei ka Jaidbynriew kaba dang don jingkyrmen na bynta ka lawei jong ki longdien”.
Kum shi bynta ban rakhe ïaka lyngkhuh sngikha jong une u riewialeh haka 15 tarik Nailar ( Wickliff Syiem Day), ka HNLC kan pyllait ïaki Sopti kiba don ïaka dur bad ki kyntien phira une u Syiem.
Une u Nongïalam ka HNLC u pyntip ba kino kino ki Paidbah ne riewshimet kiba kwah ban ïoh ïa kine ki sopti ki lah ban download ïaki dur ba yn pyllait ha Facebook bad ki lah ban phah shon hi ha ki sopti .