Press "Enter" to skip to content

Sa katno kan shim por ba ka sorkar kan pynkut ïa ki jingeh ha khappud?

‘La dap 47 tylli ki snem khlem u pud u sam ba thikna’

-Ki paitbah ka Meghalaya ki la mad ruh ïa ka jingsngewsih namar ka jingshah beh krad ha ki pulit Assam kumba ka la jia ïa ki paidbah ka thaiñ Langpih ha u snem 1979, nangta ïa ki paidbah ha Block I –II, Psiar bad ruh ïa ki nongshong shnong ka Huwapara (Malangkona) kaba dang la jia ha u snem ba la dep.-

Nongstoiñ: Sawphew hynñiew tylli ki snem ki la ïaid naduh ba ka Meghalaya ka la ïoh ïa ka Sub State, hynrei kaba khlem don ïa ki maw pud maw sam kiba thikna na baroh saw ki phang, kata na mihngi, sepngi, shatei bad shathie.
Haba phai ha kane ka bynta ym lah ban len ba ka jingpdiang matlah jong ki long shuwa ïa ka Sub state kaba khlem u maw pud maw sam, ka dei ka daw bah kaba kongsan kaba la pynlong ïa ki paidbah jong kane ka jylla khamtam eh ha ri lum Khasi bad Jaiñtia ba kin sha dakhol ïa ki jaka ki puta ha ka Assam, naduh shaphang shatei bad Bangladesh na shaphang shathie khlem da kheiñ ne ñiew ei ei ïa ki jingïaknieh pud hapdeng ka West Khasi Hills bad East Garo Hills, namar kitei ki long tang kum ki khun lung kiba ïaknieh pliang ja ha dpei.
Haba kynthoh halor kane ka bynta ki padtbah nongpule ki dei ban sngewthuh shai ba kam dei ka jingkynthoh kyrpang ïano ïano, hynrei ka long kum ka jingpynkynmaw ïa ka jingshisha ïoh lehse ki bor synshar jong ka jylla ha kane ka kynti ki don kano kano ka lad lane ka lynti ban ban pynkut noh ïa kane ka jingeh.
Halor kane ka bynta lah ban pynkynmaw ruh ba baroh ki nongïalam kiba la ïaleh ban pynïoh ïa kane ka Sub State bad baroh ki matti ba ki la buh ki la shu kut noh tang ha ka kyrteng bad ka jingkynmaw. Nalorkata haba kyrtiang dien trai ha katei ka mynnor la sngew dei ban ong ba ka jingïoh ïa ka jylla Meghalaya ka la long ka jingkyrkhu kaba khraw ïa kane ka pateng kaba mynta. Hynrei lah ruh ban ong ba ka long pynban ka jingtim namar kane ka jylla kam don jingïapher ei ei na ka ïingdulan kaba khlem jingkhang.
Kane ka dei ka jingshisha kaba khraw bad kaba lah ban pynshisha ruh lyngba ka jingkyntur pud jubor jong ka Bangladesh ha ki bynta ba shathie bad ka Assam ha ki bynta ba shatei bad mihngi. Kaba kham sngewsih ka long ba ka Meghalaya ka la mad ïa ka jingduh noh ym tang ïa ki jaka ki puta, hynrei ka la mad ruh ïa ka jingsngewsih na ka jingduh noh ïa ki mynsiem ba kordor na ka daw jong ka jingshah synreit kuli pathar ha ki pulit jong ka Assam ha u snem 2010.
Ki paitbah ka Meghalaya ki la mad ruh ïa ka jingsngewsih namar ka jingshah beh krad ha ki pulit Assam kumba ka la jia ïa ki paidbah ka thaiñ Langpih ha u snem 1979, nangta ïa ki paidbah ha Block I –II, Psiar bad ruh ïa ki nongshong shnong ka Huwapara (Malangkona) kaba dang la jia ha u snem ba la dep.
Kumta halor kane ka bynta ka jingkylli kaba mih na paidbah ba bun ba lang na kylleng ki jaka la ka long na Khasi, Jaiñtia, Ribhoi Ri War, Maram Lyngngam bad kiwei kiwei ka long “Sa katno snem kan shim por ba ka sorkar kan pynkut ïa kane ka jingeh”.