Press "Enter" to skip to content

Thmu ka Sorkar ban thaw da ka Policy lilam dewiong

Shillong, Nailar 14: Ka Sorkar Jylla shen kan sa wanrah noh ïa ka Policy ban lilam bad shalan ïa u dewiong ka Jylla kum ka jingpyntreikam ïa ka hukum jong ka Ïingkashari Supreme Court.
Ïa kane ka policy yn sa wanrah ha ka jingïalang ban wan jong ka kynhun Myntri ka ban sa shim ïa ka rai. Ïa kane la pyntip da u Chairman ka National Green Tribunal (NGT) Committee u (Rtd) Justice BP Katakey hadien ka jingïalang shong bishar ïa kane ka kam ba long hynne ka sngi balang ha Nongbah Shillong.
“Ka jingthaw ïa ka Policy da ka Sorkar Jylla kala ïaid shakhmat bad ki nongmihkhmat na ka Sorkar Jylla kila pyntip ba ki Tnad kila dep ban phah ïa ki jingai jingmut sha ka Sorkar ka ban sa wanrah ïa ka hapoh ka jingïalang jong ka kynhun myntri ban shim rai” ong u Katakey.
Haba pynpaw ba ka jingmynjur jong ka kynhun myntri ka long kaba donkam, u Katakey ula ong ba hadien ka jingshim rai ïa kane ka Policy, na ka liang jong u, un sa rah ïa ka hakhmat jong ka NGT Committee ban iatai ha ryngkat ki nongmihkhmat na ka Sorkar Jylla bad ka Coal India Limited (CIL). U ong ba ïa kane ka kam yn sa iatai ruh ha ka jingïalang ba kyrpang, ka ban long ha Guwahati, Assam ha ka 7 tarik u Nailur.
Kat kum ka jingong jong u, ka Coal India Limited kala pyntip ba kan pyntreikam da ka e-auction (jinglilam lyngba ka kor Internet) ïa u dewiong ba palat 32 lak ton ba la dep tih bad pyllang thup hapoh ka Jylla.
Ka Committee ha ka jingïalang ba dang shen, kala pan jingtip na ki karkhana dewbilat bad ki karkhana pynmih bording ba kin ai ïa ki jingtip kaba bniah haba ïadei bad ka jingthied jong ki ïa u dewiong ha kine ki san snem bala leit noh.
Haba kylli, u Chairman ula ong ba ki karkhana dewbilat bad ki karkhana pynmih bording kila pyntip ha ka kaiphod bala aiti sha ka Committee ba nalor ka jingpyndonkam ïa u dewiong, kila pyndonkam ruh ïa kiwei pat ki kynja marpoh khyndew (fuel) ba lah ban pynmih bording.
“Ngin sa shong bishar ïa baroh ki kot ki sla bala phah sha ngi kynthup ki Environmental Clearance bala ai da ka Ministry of Environment and Forest (MoEF) namar ki lah ban don ki katto katne ki kyndon ha kane ka jingai jingmut jong ka MoEF”.
U Katakey u ong ba lada dei tang u dewiong, ka mut ba kam shym don satia ka jingai jing bit ban pyndonkam ïa kiwei pat ki kynja marpoh khyndew bad kane kan dei kawei ka mat kaba hap ban peitbniah bha. Kila dep ban aiti ïa ki kot ki sla baroh bad na kine ki kot ki sla bala buh da ka MoEF, ngin sa shim ïa ka rai” ula ong.
U Katakey u ong ruh ba ka Committee kan sa aiti ruh ïa ka kaiphod halor ki kam dewiong ka Jylla, sha ka NGT ha ka 31 tarik mynta u bnai, ka ban batai bniah ïa kaei kaba ka Committee kala leh haduh mynta bad kaei ka jingshem jong ka halor kane ka kam.
Ha kajuh ka por, u Chairman ula pyntip ba ka North Eastern Space Applications Centre (NESAC) lala dep phah ïa ka kaiphod shaka Committee ba pyntip ba kala dep ban leh mapping ïa palat 24,392 tylli ki par dewiong ha Jaiñtia Hills.
U Katakey ula pynkynmaw ruh ba ka kamram jong ka Committee ka long ban peitngor ïa ka jinglilam bad jingshalan ïa u dewiong.