Press "Enter" to skip to content

Wad bniah u MP ïa ka jinglong kyrpang ki nong Kongthong

Khot wan jngoh ki paidbah ïa u Narendra Modi

Shillong, Nailar, 14: U MP ka BJP na ka Rajya Sabha u Prof. Rakesh Sinha mynta ka sngi balang u la hiar sha ka shnong Kongthong kaba hap hapoh ka Khatarshnong C&RD Block, East Khasi Hils District ban tih bniah ïa ka jinglong bakyrpang jong ki briew kiba shong basah ha kane ka shnong bad khamtam eh ha kaba ïadei bad ka jingpynneh ïa ka ‘sur kynud’ haba khot kyrteng pama ma ki.
“Ha ka dorbar ba ladep jong ka Rajya Sabha nga la rah ïa kane ka mat ban pynrung ïa ka shnong Kongthong ha ka thup Cultural Heritage jong ka UNESCO kumba la leh ïa ka shnong rit Kusköy kaba don ha North Turkey,” ong u Prof. Sinha ka jingïakren bad ki lad pathai khubor hadien ka jingwan jngoh ïa ka shnong Kongthong mynta ka sngi.
“Ka Kongthong ka dei ka shnong rit kaba don ïa ka jinglong bakyrpang bad ïa kane ka jinglong bakyrpang jong ka shnong kaba don hapoh u pud u sam ka ri India dei ban pynneh pynsah. Namarkata nga dawa ba dei ban pynneh pynsah ïa kane ka jinglong kyrpang jong kane ka shnong kaba dang bat ïa ka tynrai,” ong une u MP ka BJP.
Haba ïathuh ïa ka jingshem jong u ha ka jingleit jngoh ba shi sngi ïa ka shnong Kongthong, u Prof. Sinha u la ong, “kane ka shnong ka la long ka nuksa ïa ka jinglong jong kane ka juk ba mynta kaba dang lah ban pynneh pynsah ïa la ka tynrai.”
“Ka dei ka kamram jong nga ba nga kwah ban leit jngoh ïa kane ka shnong, ban ïakynduh ïa ki nongshong shnong bad ka la long shisha ka sngi kaba nga la lap ïa kaba wad. Nga lap ruh ba ki briew ki long kiba shi sur shi dur bad kane ka shnong ka shah kup ruh ha ka jinglaitluid jong ka pneh ka mei mariang,” u la bynrap.
Ha kawei pat ka liang, une u MP u la ïathuh ba u la ïakynduh ïa kawei pat ka jingeh tang shu iuhkjat ha kane ka shnong. “Ka surok kaba sniew bad kum kane ka shnong kaba kup ïa ka lariti bashisha jong ka ri India ka ïakynduh jingeh ha ka leit ka wan bad ka jingbym biang ka telephone,” la kynthoh une u MP.
“Nga tharai ka hospital, ka kit ka bah bad kiwei kiwei ki jingdonkam dei ban don ha kane ka shnong namarba ym don kano kano ka jingeh ban ong ba ka dei kaba don sha kyndong,” u la ong.
Haba ïathuh ba u la dawa hapoh ka Iingdorbar Thawaiñ Rajya Sabha ban tyngkai ha ka Archive bad ka Museum kum ïa kine ki sur kynud ba kham pher, u Prof. Sinha u la ong, “nga kyntu ïa ki skulbah bad khamtam eh ïa ka skulbah NEHU ban sdang plie noh da ka Department ka ban leh ïa ka jingwad bniah halor kine ki jingpynneh pynsah ïa ka tynrai.”
U la ïathuh ba u don ka jingsngew long kyrpang bha ïa kane ka thaiñ Shatei Lammihngi. “Kane ka thaiñ Shatei Lammihngi ka dei kaba kdup ïa ka jinglong bakyrpang ha kaba ngi ïohi ba ki briew ki dang kup ïa ka kolshor.”
U Prof. Sinha u la ïathuh ruh ba ki paidbah jong ka shnong Kongthong, kaba la bna nam kum ka shnong kynud sur, ka la phah ïa ka jingkhot sngew bha da ka “sur kynud” sha u Myntri Rangbah ka ri India, u Narendra Modi ban wan jngoh ïa kane ka shnong.
Ïa kane ka sur kynud ba khot sngewbha ïa u Myntri Rangbah la shna kyrpang da kawei ka longkmie jong kane ka shnong kaba kyrpad ïa u Modi ban wan jngoh ïa kane ka shnong lyngba u Prof. Sinha uba la poi iuhkjat ha kane ka shnong mynta ka sngi balang.
“Ki paidbah da lade hi ki la shna ïa kane ka sur kynud na ka bynta u Modi, ban kyrpad ïa u ban wan jngoh ïa kane ka shnong. Ngam lah ban kular eiei hynrei ngan sa rah ïa une u kyrwoh sha u Myntri Rangbah ka Jylla kum ka jingkhot sngewbha na ka kmie,” ong u Prof. Sinha.