Press "Enter" to skip to content

Don ka kharai kaba heh hapdeng ki jaka pule bad ka jingdon ki nongpule

Na man ka 1000, donka ka jingïap briew 197 ngut: CM

Shillong: U Myntri Rangbah ka jylla, u Conrad Kongal Sangma, u la pynpaw ka jingsngewkhia kaba jur ïa ka jingjngai ka kharai (gap) hapdeng ka jingdon ki jaka pule khamtam ki Kolej bad ka jingdon ki samla pule.
Haba kren ha ka sngi ba rakhe ïa ka sngi laitluid jong ka ri ha Madan Polo, u Myntri Rangbah u la ïathuh ba ha ka jylla baroh kawei ki College ki don tang 71 tylli katba ki samla pule ki don haduh  67,352 ngut,  katba ki samla kiba dang don ha ka rta ban dang hap pule ki don haduh  3,85,878 ngut. Ban pynbiang ia kane ka sorkar kan dang plie shuh ïa ki college, dei na kane ka daw ba ka sorkar kala mang pisa ban plie ia ka College ha Patharkhmah, Ribhoi bad Rongjeng, East Garo Hills.
“Kum ka sorkar, ngim lah ban sh sngap ïa kane ka jingjngai ka kharai hapdeng ki samla pule bad ka jingdon ki Kolej ha ka jylla”, la ong u Myntri Rangbah.
Haba ia dei bad ka pule puthi ha ki kyrdan Secondary, u Conrad u la ong ba ki Secondary School ki don 1,04,727 tylli bad ha ka Higher Secondary schools ki don  54,739 tylli. Hynrei ki briew kiba don ha pdeng ka rta 15-19 snem ki long 4,03,675 ngut. “ Kine ki jingkheiñ ki pyni ba ka don shibun ka jingïapher ha ka jingdon ki samla pule bad ki skul” la ong u Conrad.
Ban weng ïa kane ka jingeh ka sorkar jylla kan sdang noh ïa ki Ekalavya Model Residential Schools (EMRS) ha baroh ki Block ha ka jylla bad ka jingtei ia kine ki skul na ka bynta kawei kawei ka jinglut kan long haduh T.24 klur tyngka bad kawei ka skul kan ngiam haduh 480 ngut ki samla pule. U la ïathuh ba haduh mynta la dep ban ioh pisa 11 tylli bad sa 25 tylli yn ïoh pisa mynta u snem.
U Myntri Rangbah u la ong ba na ka liang jong ka sorkar ka kwah ban kyntu ïa ki riew shimet ba kin wan sha khmat na ka bynta ban kyrshan lang ha ka pule puthi da kaba seng ia ki skul bad ki Kolej. “Ka sorkar ka kloi ban ai jingiarap ban tei ïa ki skul, Kolej ryngkat bad ka jingsiew ban pyniaid ia ki”, la ong u Myntri Rangbah.
Haba phai sha ka koit ka khiah u Myntri Rangbah, u la pynbna paidbah ka sorkar kan pynlut 20 klur tyngka ban shna ïa ki jaka buh dawai ha baroh ki District ha ka jylla. U la ong kumba ka long mynta na man ka 1000 ngut ka jingïap ki briew ka long 197 ngut bad ka sorkar kala buh ïa ka thong hapoh kine ki lai snem kan pynduna ïa kane ka jingïap.
Ha kaba ïadei bad ka jingdon ki nongsumar ïa kiba pang, u Myntri Rangbah la ong ba ki don 436 ngut ki Doktor sorkar ha ka jylla baroh kawei. Kumba long ha ka pule puthi, ha ka koit ka khiah ruh, u Myntri Rangbah u ong ba ka sorkar ka kyntu ïa ki riew shimet ba kin wan sha khmat ban ïa snoh kti lang bad ka sorkar. Kumba ka long mynta kumba 22 tylli ki jaka ai jingsumar jong ka sorkar 7 tylli na ki la hap ban ia treilang bad ki riew shimet. Ban pynioh dawai ei ha ki jaka sumar jong ka sorkar la mang pisa T. 66 klur tban thied dawai.
Ha kane ka jingrakhe, u Myntri Rangbah u la kyntiew ïa ka lama jong ka ri bad shim ruh ïa ka Rashtriya Salute na ki 26 tylli ki kynhun ba ïaid parade kiba kynthup ïa ka 58GTC, BSF, CRPF, MLP, SF10, Assam Police, Meghalaya Police Training School, NCC boys and Girls, Meghalaya Bharat Scouts and Guides, Meghalaya Red Cross Society, St.Mary’s Higher Secondary School, Little Flower Secondary School, Pine Mount School, Holy Cross School, Gorkha Patshala Secondary School, Government Girls Higher Secondary School, St. Joseph’s Higher Secondary School, Lakreh Memorial School, Christian Academy School, Meghalaya Police Public School boys and girls, St. Anthony’s Higher Secondary School, Horse contingent of Assam Rifles Higher Secondary School bad ka kynhun ki nongput nongtem jong ka Border Wing Home Guards, BSF and Assam Rifles.
ïa ka March Past la jop da ka Pine Mount School, ba ar ka Loreto Convent School bad balai ka St. Mary’s Higher Secondary School. Ha kane ka sngi, u Myntri Rangbah, u la pyllait paidbah ruh ïa ka kot ba la ai kyrteng “Meghalaya Close to the Heart”.
Ha kane ka sngi la ïadon lang ruh ki nongmihkhmat paidbah, ki ophisar sorkar, ki rangbah shipai, ki khynnah skul bad ki paidbah babun.