Press "Enter" to skip to content

Halor ka jingkhynra Trading Licence ka KHADC

Dr B.Dkhar

Ka jingwan tuid ki bar jylla ha ka jylla jong ngi ka dei ka jingsngewkhïa kaba lah slem bha ha ngi ki trai jylla khamtam eh ha kito ki briew kiba don shisha kata ka mynsiem kitkhlieh bad ka jingpyrkhat ïa ka lawei jong ka Jaitbynriew khasi jong ngi. Ha kine ki khyndiat snem ka jingbun ki bar jylla ha ka jylla khamtam ha sor Shillong nga ïohi kala kiew stet bha Shaba palat bad kane kan nymkut tang katne hynrei kan nangjur kat nang mih ki sngi. Ka daw ba nyngkong eh hi ka long ba kito ki sawphew lakh ngut kiba la shah kyntait ha ka NRCAssam hato shaei kin leit? La tikna ba kin wan rung beit hangne kum ki nong bylla sngi lane kum ki nongdie rud surok shipor bad nangta Suki Suki kin sa kylla trai shnong kumto hi. I Sa kaweipat ka Meghalaya ka dei tang ka jylla hapoh dong mihngi kaba baroh ki peit jawdud bha ïa ka jingitynnad ka suiñ bneng, ka mariang sawdong sawkun, ka jinglui lui ki briew shaba palat kaba ki lah ban shim kabu katba mon da kaba suk bad ka jingbun ki jangew ki jathang kiba ki lah ban ïoh kloi da kaba suk.
Khatduh eh ka dei ruh ka jylla kaba suk tam ban rung ban mih ïa ki bar jylla khlem don jingkhanglad na ka daw jong ka jingbym nang ban pyndonkam ïa ka bor synshar ka khadar ban tehlakam bad sa ka wei ruh ka dei ka jingtlot jong ngi hi ha ka synshar ka khadar. Hadien ka jingïoh bat ïa ka shuki EM Incharge jong ka khaïi pateng ka KHADC U bah Paul Lyngdoh ula pynpaw ba ka jingpyrkhing ha ka khaïi pateng kan dei ka wei na ki lad ba ngi lah ban tehlakam ïa ka jingwantuid ki bar jylla. Nga mynjur bha ïa kata bad sngewtynnad ruh ban ïohi ba ka kam ka ïaid shisha katkum ka ktien. Ka jingpynkylla ka rukom treikam ha ka juk bathymmai mynta, ka jingpynkiew ïa ki bai trading licence, ka jingpynkhlaiñ ïa ki forcementwings, khamtam ka jingkhynra trading licence ha ki katto katne ki jaka ba khah khah kaba hap hapoh u pud u sam jong ka District council khamtam ha sor Shillong ka pynpaw ïa ka jingshim khia u EM Incharge. Kumba u la ong. Nga sngew kum ban ong ruh ba kane ka dei ka kam kaba bha tam eh jong kane ka EC bathymmai ka KHADC kaba ka la leh haduh mynta.
Napdeng ki dukan kiba la leit khynra lane ki company la ïohi khambun hi ki bym biang ka trading licence bad la shu khang tala noh kumto khlem pynshitom ei ei. Kane ka pyni haduh katno ka jingsynjor ka jingtreikam ki EC barim ka KHADC. Hangne bun ki jingkylli kiba nga kwah ban buh ïa ka KHADC. Kawei ka jingkylli kaba rit bha ka long ba, balei ba ka KHADC ka khlem pynshitom tyngeh ïa kito ki nongdie ne ki company be aiñ? Kaei ka jingsneng ba phin ai da kaba shu khangtala kumto bad shu bthah ba kin pynbiang kot sla? Kito baroh ki dei ki nongpynkheiñ aiñ bad kum kito ki dei hok ban ïoh ïa ka jingpynshitom. Lada ki shu pyllait khlem pynshitom ei-ei ka mut ba ka rukom pyntreikam ïa ka aiñ ka dang tlot hapoh ka KHADC jong ngi. Ki briew kiba pynkheiñ ïa ka aiñ la dei ban pynshitom tyngeh ruh da ka aiñ.
Ka jingpynshitom ka dei ban ai da ka jingdaiñ kuna kaba tyngeh ïa ki bym pynthymmai ïa ka Trading Licence, bad dei ban weng shi junom ryngkat ka jingdaiñ kuna kaba heh bha ïa kiba plie dukan ne company be aiñ. Lym kumta ka jingkhynra licence khlem pynshitom jur kan nym pyrkhing ïa ka jingwan rung jong ki hynrei kan nangpynshlur shuh shuh pynban.Sa kawei pat ka phang ba nga kwah ban kren ka dei sha phang ka jingai Trading Licence. Kumba ngi la iohi hi ba ka khaïi ka pateng ha jylla jong ngi la bat kham bun da ki bar jylla khamtam ha sor Shillong. Lada ïaid ha Shillong khamtam ha khyndai lad, polo, Laban,Iewduh teng teng ym sngewshuh kumba ïaid ha Jaka la jong la sngew kumba ïaid pynban ha Ri Nongwei. Hynrei sngewsih ba ka jingai trading licence katta ka nangjur, wat tang ha u snem 2018-19 ka jingai Licence ka la poi lpa sha ka 261 tylli. Haduh ban da kut lei u snem ym tip shuh haduh katno kan poi? Ha nga marwei nga ngeit skhem ba phim lah ban pyrkhing ïa ka jingwantuid ki bar jylla tang da kaba pynkiew ïa ka bai trading licence, hynrei phi lah ban leh ïa kane sa tang lada phi pynsangeh noh shisyndon ban ai Licence khamtam ha sor Shillong. Ka pisa kam lah ban khanglad ïa ki hynrei ka aiñ ka lah ban leh kumta.
Katkum ka United Khasi-Jaintia (Trading by non-tribals) Regulations1954,ha ka section (3) sub-section (3A) paragraph synrop (clause (e) ka la kren shai hangne ba ynda ka jingai Trading Licence ïa ki bar jylla ka la poi sha ka thong ba la mang (limits) ban ai da ka District Council ha kano kano ka jaka kaba hap hapoh u pud u sam jong ka KHADC, ka District Council ka lah ban pynsangeh noh shisyndon ban ïai ai Trading Licence thymmai ïa ki bar jylla ha kata ka jaka. Ka jingkylli mynta ka long ba hato ka KHADC jong ngi ka la don ne em kum kane ka jingbuh thong baskhem (fixed limits) ban pynsangeh noh ka jingai Licence ha ki sor ba la Ibit ban pynsangeh shisyndon? Nga sngew kum ban ong ba ha Shillong bad ha ki thaiñ border kylleng lah ibit ban pyntrei kam noh ïa katei ka aiñ, kane ka long ban ailad lem noh ïa ki briew la jong ban ïoh jaka ban sdang khaïi pateng bad ban tyngkai ïa ki jaka ki khyndew ki shyiap ïa ki longdien ban wan. Lada ka KHADC ka ïai bteng ban ai Licence khamtam ha Shillong kan jia aïu ïa ka pateng ban wan ka jaidbynriew jong ngi? Kane kam da mut eh ba nga pyrshah ne isih bar jylla palat, hynrei ka dei tang ka daw ba nga kwah ban pynkhlaiñ ïa la ka jaidbynriew la jong. Hooid, nga ngeit ruh ba ka jingwan ki nongkhaïi ba nabar khamtam ki company ka lah ban kyntiew ïa ka ïoh ka kot ka jylla, hynrei nyngkong eh ngi dei ban pynkiew shwa ïa la ka jaidbynriew la jong bad ïa ka jaidbynriew la jong barabor ngi dei ban buh ha khmat eh…..