Press "Enter" to skip to content

Hap peitngor ka India na ki riew shit ñiam

Ka India ka la dep ba kan jam sha u maw mer ka jingïoh ïa ka jinglaitluid kaba 73 snem pura, na kata ka jingshah synshar ha ki nongwei, ne ha u Phareng, uba shwa ba un mih noh na kane ka ri,u da dep ba un bet ïa u symbai, jong ka jinghap ban mih paw noh jong ki artylli ki ri, kata ka India bad ka Pakistan, ha kaba ka jingmih pat kine ki artylli ka la pynlong ruh ïa ki ba kin da poi ha ka khep ba kin ïa hiar thma iwei ïa iwei pat.
Kumba ka long mynta, ka India hapoh ka jingsynshar jong ka sorkar NDA, la mih paw ki kynja kynhun kiba da shit ñiam bha haduh katta katta, kiba da leh ruh ïa ki jait kam, kiba lah ban pynrhem bha ïa ka kynja thma ñiam, kaba lada ym lap ba tem ïaka, ka India hi kan sa mad ïa ka jingeh. Ka kynhun ki riew shit ñiam, ki ba leh shisha ïa ki jait kam kaba ktah ruh syndon wat ïa ka hok longbriew manbriew, kiba da pynkheiñ ruh syndon ïa kita ki kyndon kat kumba la dep ban pruid dak ha ka riti synshar jong ka ri India. Ka jingjia kiba dang shen, ban shim ïa ka bor ha la ki jong ki kti ban ai ïa ka jinsgneng ïa kita ki briew kiba pynïap ïa ki mrad ba juh ia bam doh ïaki, lehse kidei ki dak kaba sdang pat ban pynkha roi ïa ka mynsiem ban i-sih ïaka jingngeit ñiam jong kiwei.
Hynrei ha ka riti synshar jong ka ri, kam shim la ithuh ne pynskan ïa kano kano ruh ka jait ñiam, hynrei ka ailad ba man uwei pa uwei u bynriew ba im ba shong ba sah hapoh kane ka ri ba-ïar, u don ïa ka hok ba un ngeit ne ban mane laitluid ïa kano kano ka ñiam, hynrei kata ka ñiam kaba u ngeit kam dei pat ba kan don jingkynthoh ïa kiwei kiwei pat ki ñiam ki rukom. Pynban, ka jingïoh ban bat ka NDA ïaka khet synshar, shu san kynsan ki riew shit ñiam,kiba shu pynkhraw jubor ïala ka tynrai jingngeit bad mynta kine ki la wan ba kin mihpaw, ha kaba ki leh ïa ki jait kam, kiba ki sdang naka bynta ba kin pynkha roi, ïa kata ka mynsiem ïa ishih hapdeng para nong shnong jong kane ka ri.
Ha ka por jong ka jingïakhun ban ïoh ïaka jinglaitluid, ka sorkar Phareng ka tip bad ka ïohi ïa ka jingkhlaiñ bor u paid ka ri India, namar hapoh ki nongïalam ba khraw ka ri, kum ki jong u Mahatma Gandhi bad kiwei kiwei, ki ïaid lang ryngkat bad ki paid riewngeit jong ki jait ñiam bapher bapher, kim salia ban jaw ka snam, ne ban ïap ha ki ktang suloi bad ki ïing byndi jong ka sorkar Phareng, hynrei ki da aiti shisha met bad mynsiem khnang ba ka pateng kaba mynta kan ïoh ba kan mad ïa kata ka jingïoh laitluid kaba shisha.
Kumta, ka sorkar NDA, ka hap ba kan shim khia ba ïa ki riew shit ñiam donkam ban tehlakam ïaki, namar wei shisien la ailad, ka lah ba kan bet biang ïa u kynja symbai, uba sa shisien kum ka ri, ka lah ban mih ka jingïakhih kaba sa shisien kaban pynpait ne ban pharia ruh syndon ïa ka hi baroh kawei. Kiba bun na ki riew ngeit, kiba dang duna paid, ki pynrit bha ïalade, namar ki tieng bad ki smiej ïoh ba ki shah thombor ha ki heh paid jong ka ri, kaba kum kane ka jait mynsiem la donkam ban pynduh ban pyndam, hynrei ai keiñ ba baroh ki jait ñiam kiba don ha kane ka ri, kin ïoh shisha ïa kata ka mane kaba laitluid, ka bym don jingtieng ne smiej ïano ïano ruh.
Ha ki 73 snem ka jingoh laitluid jong ka ri, ka India ka la dep ba kan mad la bun bun sien ïa ka jingïaumsnam tang naka bynta jong ka ñiam, kiba la kha ne pun ïa kiba bun ki sohkhliang, kiba haduh mynta mynne la eh shisha ban pynduh pyndam ïaki. Dei ha kine ki sohkhliang, ba napoh napoh, ka jingsat mynsiem bad jingrhem jong ka dohnud ban ïoh ban pynhiar ïaka kput kylliang ruh ka sdang ba kan mihpaw, ha kaba don ruh ki kato katne ki jylla, kiba mynta ki ïeng ba kin ïakhih da kaba tyngeh naka bynta ban dawa pat ïa kata ka hok kaba kidei ba kin ïoh ne ban ïakhih tyngeh ruh syndon naka bynta ban ïoh wat ïala ka jong ka ri kaba laitluid na kane ka ri.