Press "Enter" to skip to content

Hapdeng u slap mih u paidbah ban rakhe Independence Day ha West Jaiñtia Hills

Jowai, Nailar 16: Ka jing rakhe ïaka sngi laitluid jong ka ri kaba ‘73rd Indepen-dence Day’ ha West Jaiñtia Hills kala kylla long kaba phuh kaba phieng ha kaba u paidbah um salia shuh ban mih wat hadpeng u slap.
Naduh na Jowai, Am-lrem, Shangpung, Wahiajer, Mynso, Nongkynrih, Mow-tyrshiah, Saphai, Mooshrot, Hynniwkmai bad kiwei kiwei ki shnong kila shim bynta shitrhem ban lehkmen ïa ka jingioh laitluid ka Ri.
Ha sorbah Jowai, ka jingrakhe ïaka Independence kala long ha madan Jrisalein, Chutwakhu Jowai ha kaba u Myntri Fisheries bad kiwei kiwei Ma Comingone Ymbon ula pynher ïaka lama lai rong ka ri bad shim ruh ïaka salute.
Ha Jowai baroh ki don 33 kynhun kiba ïashimbynta haka parade naduh ka tnad Police, 3rd Battalion, Home Guard, NCC, Scouts & Guides kynthup ïaki 26 skul bad kolej. u Parade Commander u dei u DSP Donkupar Moksha, MPS, and 2nd in command SI Smt.Ibashisha Kharpran.
Ka Khimumsniang Secondary School kala long ka lahduh haka parade bad ka Thomas Jones Synod College bad ka Seinraij Higher Secondary School ki lahduh ba ar bad ba lai. La sam ruh kki khusnam sha ki nongjop ha ki nongashimbynta haka shad cultural kaba ka Dulong Secondary School kala wan nyngkong, Thomas Jones Synod College bad ka Baite Cultural Organisation, Jowai kila wan ba ar bad ba lai.
Haba kren haka ne ka sngi kyrpang ka ri, U Ma Comingone Ymbon ula pynkynmaw ïaka jinglen lade bad aiti ki riewkhraw ka ri ban pynïoh laidluid iaka ri. Ula ïathuh ruh ïa shibun ki kam ba ka sorkar kala leh na ka bynta ban wanrah ïaka roi ka par ka Jylla.
Ula kyntu iaki paidbah ban ai ka jingïatreilang bad ka sorkar ban wanrah aka shongsaiñ bad ka roi ka par ka jylla baroh kawei. Ula ong shuh ba ka sorkar MDA ka pyrshang ïaki buit ban wanrah ïaka roi ka par ha ka jylla ban kyntiew ïa ki paid nongshong shnong da kaba phai khmat sha ka pule ka puthi, ka koit ka khiah, ka jingrat diengkhong ia ka jingduk.
“Ka sorkar ialeh pyrshah ïa ki jingeh jingtynjuh bad ban thaw dur thymmai ïa ka Meghalaya kum ka jylla kaba kiew shaphrang hapoh ka snem 2030. Ka thong jong ngi ka long ban tei ia ka Meghalaya kaba thymmai bad kaba lah ban kyrshan ialade, ha kaba iwei pa iwei i nongshong shnong kin ioh bynta ha ki kam pynroi da kaba shim kabu na ki spah mariang bad ki jingdon jingem jong ka. Ban kynjoh sha kane ka thong, ngi don ki buit treikam ban wanrah ka roi ka par lyngba ki sawtylli ki paia ki ban kyrshan ia ka jingthmu – ka jingkyntiew ia ki nongshong shnong, ka jingpynkhie im thymmai ïa ki tnat kiba kongsan tam, ka jingpynbiang ia ki jingdonkam ki paidbah bad ka jingkyntiew ia ki nongseng kam lajong. Ka jingiada ïa ka mariang, ka jingkyntiew ïa ka synshar khadar ha ki bynta baroh bad ka jingpyntyllun ïa ka pisa sha ki kam pynroi kin long ki lad kiba radbah ban pynioh ia kane ka thong,” la ong u Ma Comiingone Ymbon
Ha ka tnad Education, ka sorkar ka sngew donkam ban kyntiew ia ka pule puthi ïa baroh. Na ki 8095 tylli ki shnong ha ka jylla, 7050 tylli ki don ki lower primary school bad 2986 ki don ki skul upper primary school. Ka sorkar ka phaikhmat bha sha ki jingpule ïa ka kyrdan secondary. Yn buh ia ki Ekalavya Model Residential School (EMRS) da ka jingkyrshan jong ka Ministry of Tribal Affairs ha ki khatwei tyli ki block – Mawkynrew, East Khasi Hills, Nongstoin, West Khasi Hills, Maw kyrwat, South West Khasi Hills, Kharkutta, North Garo Hills, Rongara, South Garo Hills, Amlarem, West Jaintia Hills, Samanda, East Garo Hills, Tikrikilla, West Garo Hills, Umsning, Ri Bhoi, Khliehriat, East Jaintia Hills bad Zigzak ha South West Garo Hills.
Yn tei ia kine ki residential school ha ka jinglut kaba 24 klur bad ynda la dep, kine ki skul kin pynioh ka jingnang jingstad ia 480 ngut ki khynnah. Ka Ministry of Tribal Affairs kala pynbna shuh shuh ba yn sa mang pisa sa 25 tylli ki EMRS ha ka jylla ha kine ki arsnem ban wan. Ka tnat Education ka dang pyniaid shakhmat ban pynioh ia ki jaka bad ban pynbiang ia ki jinglut ban tei ia ki 11 tylli ki EMRS.
Mynta ka jingtei ka dang ïaid shaphrang ïa kumba 117 tylli ki secondary school lyngba ka projek bei tyngka jong ka Asian Development Bank (ADB), “Supporting Human Capital Development in Meghalaya.” Hapoh kane kajuh ka projek, la lah ban ai jinghikai ïa 3228 ngut ki nonghikai bad la pyndonkam da ka ICT ha ki 36 tylli ki skul.
Ha Shangpung u ma MLA ka Sohra Bah Gavin Mylliem ula pynher iaka lama bad shim ïaka salute. La don 24 tylli ki kynhun kiba la ïashimbynta haka Parade kaba ïalam da u Parade Commander u Shidor S Passah. La don ka jinglehkai Drill bad ka rwai ka shad ïeid ri bala shimbynta da ki khynnah skul.
Ha Amlarem Sub Divi-sion u Chairman, Meghalaya Industrial Development Corporation Ltd u Renikton Lyngdoh Tongkhar ula pynher iaka lama lai rong ka ri bad ula shim ruh iaka salut e iaki nongashimbynta haka parade naduh ka Meghalaya Police bad ki schools ha madan ïalehkai ka Amlarem Secondary School. La pynkup burom ïa ki samla kiba pass bha haka SSLC a u Dimarkithmu Gayang na J.N.M. Secon-dary School, Lamin bad ka Dimiatmon Pamthied na Amwi Jarain Secondary School.