Press "Enter" to skip to content

Ka National Games, ka rynsan ban kyntiew ïa ka Meghalaya ha ka map ïalehkai jong ka India : CM

Shillong, Nailar 16 : U Myntri Rangbah ka Jylla, u Conrad K Sangma u la ong ba ka thong jong ka sorkar ka long ba kin shim ïa ka National Games kum ka rynsan ban plie ïa ka lad ka lynti na ka bynta ban kyntiew ïa ka jylla ha ki kam ïalehkai bad khamtam eh ban pynrung ïa ka jylla ha ka map ïalehkai jong ka Ri India.
Haba kren ha ka jingrakhe ïa ka lyngkhuh dap 73 snem ka jingïoh jong ka Ri ïa ka synshar Laitluid (Independence Day 2019) ha madan Polo, u ba ka sorkar ka buh thong ban pynlong ïa katei ka National Games ha u 2022 ha ka rukom kaba shongkun namar kadei artad ka snem ba ka Jylla kan rakhe ïa ka jingdap 50 snem ka jingïoh la ka jong ka jylla ba pura.
“Ngi la ïoh ïa ka jaka ha Mawdiangdiang ha Shillong bad ruh ha Dalmagre ha Tura bad ha kiwei kiwei ki jaka na ka bynta ban tei ïa ki Stadium bad Games Village,” u la ong da kaba bynrap ba ka jingpynkhreh na ka bynta ban pynwandur ïa ki Stadium bad kiwei kiwei ki jingtei ki la sdang.
U Myntri Rangbah u la ïathuh ruh ba ka jingtyrwa ban ïoh ïa ka mang tyngka kaba 170 klur an ka bynta ban tei ïa ka Main Stadium ha Mawdiangdiang ka la ïaid beit shakhmat. “Ka tnad ïalehkai ka Jylla ka la trei laka bynta bad ki Sports Association bad ka jingpynkhreh jong ka Jylla na ka bynta katei ka lympung ka la sdang,” u la bynrap shuh shuh.
Nalorkata, u la pynbna ruh ba ka sorkar kan pynlong ïa ka Meghalaya Games ha u Naiwieng mynta u snem kum shi bynta ban sdang artad ïa ka jingpynkhreh na ka bynta ka National Games.
“Ka long ruh kaba donkam ban tip ba ka sien kaba khatduh ba la pynlong ïa ka Meghalaya Games kadei ha u snem 2006 bad ïa kane ngin lah ban pynkhie im biang hadien 13 snem,” ong Conrad da kaba bynrap ba kin pynlong ruh bun ki lympung kum shi bynta ban lum bad ai mynsiem ïa ki nongïalehkai kynthei bad shynrang.
Ha kane ka sngi u Myntri Rangbah u la ong ruh ba ka jylla ka don bun bha ki rang bad ki thei ïalehkai ba kynsai kiba la pawnam ym tang ha ka jylla hynrei shabar ruh kumjuh. U la pynkynmaw ruh ba ka Blessila A Sangma ka heprit ba dang 19 snem ka rta na Tura ka la khur takma ksiar ha ka 4th Child Cup bad 10th Mini National Fencing Championship kaba long ha Maharshtra dang shen.
Shuh shuh u la ong ruh ba uwei na ki rangmareh ba stet tam ka India na kane ka jylla, u Bah Tlanding Wahlang u la mihkhmat ïa ka Ri ha Portugal bad shim bynta ha ka World Trail Championship. Ki don bun ki nongïalehkai ba u Myntri Rangbah u pynpaw ha katei ka sngi da kaba jer kyrteng ïa u samla Winward Sangma, ka Phoebe Dale Nongrum, ki khynnah skul ka Kiddies Corner Secondary School, ka Aroha Choi, Dominic M Sangma, kynthup ïa ka Tanvi Raksam Marak, kiba la wanrah ïa ka burom ïa ka jylla ha la ki jong ki jong ki lympung iakob ba ki mihkhmat la ka long ha ka jingïalehkai, ka rwai ka siaw, ka shna phlim, thei bhabriew bad ha kiwei kiwei.