Press "Enter" to skip to content

Sngewnguh u MDC bad ka M:19-SSO ba thaw ïa ia Mawlai Out Post bad surok Mawlai By-pass

Shillong Nailar 16: Kan long ka sngi kaba kmen tam ïa ki paidbah ka shnong Mawlai bad ïa ki paidbah nongshong shnong ka Jylla hadien ba ka Sorkar Jylla kan sa plie paidbah ïa ka surok Mawlai Bypass ka ban pynsuk ïa ka leit ka wan na Shillong sha Guwahati.
Ka Mawlai kaba long ka Constituency baheh tam ha Meghalaya, kan long kawei na ki Constituency kaba donhok ban ïoh ïa ka Police Outpost hadien ba la pyntreikam ïa ka thanat Mawlai 27 snem mynshwa kata ha u snem 1992.
Ïa ka thanat Mawlai la pynkha ha ka 2 tarik Jylliew, 1992 bad kane ka thanat ka la treikam shwa na ka ïing bashipor. Ka ka ïing bathymmai bad ophis treikam bapura jong kane ka Thanat Mawlai la ïoh ban plie ha ka 15 tarik, Risaw 2014 ha kaba la tnat Pulit ka la pynkha syndon ïa ka shnat pynïaid kali (traffic branch).
Kum ka Constituency kaba heh, bad kaba don bun tylli ki shnong, ka Sorkar MDA ka la ibit ïa ka Thanat Mawlai ban pynkha noh sa ïa ka Police Outpost bad dei halor kane ka nongrim ka Sorkar ka la sngew ïahap bad ka jingdawa jong u MDC ka Mawlai, Bah Teiborlang Pathaw lem bad ka kynhun ki Rangbah Shnong jong hapoh ka Mawlai Town Dorbar kiba la pynsngew sha ka Sorkar ha ka 15 tarik Naitung mynta u snem.
Na ka liang u Bah Pathaw lem bad ki Rangbah Shnong ki la banjur halor ka jingdonkam ban plie ïa ka Police Outpost ha Mawlai Mawkynroh ynda ka Sorkar ka la thmu ban pyntreikam ïa ka Mawlai Bypass khnang ba kan long ka jingshngaiñ ïa ka thaiñ bad ban peitngor ïa ki kam sniew kiba lah ban mih khamtam ynda la treikam pura kane ka surok thymmai.
Ki jaka kiba ka Police Outpost kan peit yn sa pynbha paidbah ha ka sngi ba plie, hynrei katkum ba la lah ban sngewthuh, ki jaka kiba hap ha kane ka Outpost ki long ka Mawlai Mawroh,Kynton Massar, Umshing, Mawkyn-roh kynthup lang bad ka NEHU, Mawtawar, Umsaw, Nongkohlew, Mawsait-khnam, Umphrew, Umja-thang, Umrynjah, Nongkya bad madam Mawkhar bad kiwei kiwei ki shnong.
Na ka liang u MDC Bah Teiborlang Pathaw u la pynpaw ka jingsngewnguh kaba khraw ïa ka Sorkar MDA naduh u Myntri Rangbah, Symbud Myntri Rangbah bad Myntri ka tnat Kam Pohïing haba ïadei bad ka jingpynurlong ïa kane ka jingangnud jong ki paidbah ka thaiñ Mawlai ha kaba la lah ban plie ïa ka Mawlai Bypass bad jingplie ïa ka Police Outpost.
U Bah Pathaw u la ong ba u don ruh ka jingkyrmen skhem ba ki jingdawa jong ki paidbah Mawlai kin urlong khamtam haba ïadei bad ka jaka theh jaboh jabaiñ kaba don ha Mawlai Mawïong lyngba ka jingshimkhia jong ka Sorkar khamtam lyngba ka jingtrei shitom u Myntri ka tnat Pynroi Sor.
Ha kajuh ka por, ka Mawlai:19-Social Service Organisation (M:19-SSO) ka pynpaw ka jingsngewnguh ïa ka Sorkar Jylla lem bad ïa u MDC ka Mawlai, bad ka Mawlai Town Dorbar haba ïadei bad ka jingthaw ïa la Police Outpost bad jingplie noh ïa ka Mawlai Bypass.
“Kumba ngi kyrmen ka la long shisha” la ong ka M:19-SSO ha kaba ka la kyntu bad wer lang ïa ki nongkyrshan baroh kat kiba lah ban poi lang sha katei ka jingplie ïa kitei ki ar tylli ki projek ha ka sngi Saitjaiñ.