Press "Enter" to skip to content

Wat pynlong jaka bret ñiut ïa ka jngohkai ha Mawphanlur

– Maham ka HYC Mawthadraishan

Nongstoiñ: Ka Mawthadraishan kaba hap ha West Khasi Hills District ka dei kawei na ki thaiñ jong ka West Khasi Hills kaba bun byllai ki jaka jngoh kai, kynthup ïa ka Mawphanlur, Wah Kynshi, Lum Mawthadraishan, Markham, Mawhiang bad kiwei kiwei. Da ka jingdon jong kine ki jaka jngohkai ba pawnam, ka la sdang kyntiew ïa ki Nongshong shnong ka thaiñ Mawthadraishan. Ym lah ruh ban len ba haba don ki jaka jngoh kai ka don ka jingïohnong tad lada nang ban sumar sukher ïa ki sawdong sawkun jong kita ki jaka jngoh kai Pyrthei.
Hynrei ka long kaei kaei kaba sngewsih ba kumba long mynta ka Mawphanlur ka la sdang ban dap da ki jaboh kum ki bilor kyiad, ki plastic bad kiwei kiwei, ha kaba ki nongleit kai sha katei ka jaka kim nang ban tip la ka akor ka burom hynrei ki shu bret katba lap. Jan ha man ki lad ki jaka la lap beit da ki bilor bad ki plastic ba bun jait bad kane ka wanrah ïa ka jingijli bad ka pynhiar dor ruh ïa katei ka jaka jngoh kai kaba itynnad.
Haba ïohi ïa kane ka jinglong jong ki nongwan peitkai, ka seng HYC Mawthadraishan Circle kam lah ban shu sngap. Hynrei kam banse ban buh da ka jingmaham ïa kiba wan kai sha ka thaiñ jong ba kim dei ban leit bret ïa ki plastic chips, bitor plastic, ki bitor jingdih buaid bad kiwei kiwei ki jaboh kiba pynsniew dur ïa ka jingitynnad ka mariang ha Mawthadraishan.
m tang ha kine ki jaka jngoh kai, hynrei ka seng ka kyntu ruh ba ym dei ban bret jakhlia klumar ha ki rud ki kiar jong ka surok bah bad ki dei ban burom lem ïa ka Mei Mariang kaba itynnad ha kane ka thaiñ Mawthadraishan bad ha West Khasi Hills District ruh kumjuh.
“Kine ki jaka jngoh kai ha Mawthadraishan ki don ruh la ki khana kiba shong Nongrim ba ngi dei ban sumar khuid ïa ki. Ka Mawphanlur bad na ki tynrai lum jong ka, ka pynmih ïa ki um bam um dih ba shngiam ba bsa um ïa palat 30 tylli ki shnong na Markasa bad ki Area jong ka. Ka Wah Kynshi ka dei kawei na ki wah kaba ai bam ai dih ïa ki paidbah nongshong shnong kiba im ban tong doh ban ïoh die ha ki iew khnang ban ïoh bsa ha ïing. U lum Mawthadraishan u dei uwei na ki lum bna nam u ba jrong tam ha Ri Hynñiewtrep bad na u ne u lum, ki nongshang pyrthei ki ju wan bha ha ki bnai tlang ha ki por mynstep ban peit kyndiang ïa ka jingitynnad ki lum Himalaya bad da ka jingsumar ka shnong Lawdisai, u ne u lum u itynnad bad khuid bha bad mynta ngi ïoh sa kawei ka jaka jngohkai ha Markham da ka jingdon u lum Murok, la nang kyntiew shuh shuh ïa ka jingtuid ki nongwan jngoh kai sha kane ka thaiñ Mawthadraishan hi baroh kawei. U Mawhiang ruh u dei uwei na u maw ba itynnad bad khring ïa kiba bun kiba wan jngoh kai ïa ka jingitynnad u ne u maw bad hajan jong u la don ruh ka kynroh khad ar jingker kaba itynnad”, ong ka kyrwoh na u Phondar Sohshang Socio & Cultural Secretary ka HYC Mawthadraishan.
“Ki Nongshong shnong ha kane thaiñ ki long ki briew kiba im ha ka rep ka riang bad ki dei kiba smat ban sumar khuid ïa kine ki jaka jngoh kai. Hynrei naduh ba la paw pyrthei ki jaka jngoh kai, kane ka thaiñ ka la sdang ban bun sa ki plastic chips, bitor plastic bad ki bitor jingdih buaid ba la pait.
Kumta ka Seng ka sngewkhia ïa ka kum kane ka rukom leh riew khlaw ki nongwan jngohkai kiba pynsniew dur ïa ka jinglong kyntang jong ki lum ki wah pyngngad jong ngi. Namarkata, ngi kyntu ïa baroh ba phin sumar lem ïa ki sawdong sawkun jong kane ka thaiñ bad lada ngi lap ïa kiba pynjaboh, ka Seng ka la ïa syllok bad ki Sordar Shnong ba ki aiñ Shnong kin pynsaja da kaba tyngeh”, pynkut ka kyrwoh.