Press "Enter" to skip to content

“Hato ngi dang long trai shisha ha la ka jong ka Ri ????”

Ma Nangai Sutnga , Iooksi WJH.

Kane kadei ka jingkylli kaba nga kwah ban buh sha ki para ri baroh ban ïa jubab hi ïa ka la ka jong ka jong ka jingshem bad hala ka jong ka jong ka jingsngew. Tharai la jan baroh ngi la ïohi hi ba kumno ka jaidbynriew ka long mynta, bad mano ban long trai, mano ba synshar , mano ba pynïaid, bad mano ba bat ïa u shabuk jong ka khaïi ka pateng.
La jan baroh ngi la sngewthuh hi ïa ka jingmut jong ka kyntien ” Long trai” , kumta ym donkam ban batai shai ne batai bniah ïaphi ïa ka jingmut katei ka kyntien.
Haba ngi phai sha ka jinglong trai jong ngi ïa ka khyndew ka shyiap, hooid ym lah ban len dei ka jingdon ka Land Transfer Act laba pynkupbor ïangi ban dang ïoh ban long trai halade ïa la ka khyndew ka shyiap ka jong ngi. Hynrei watla katta ruh mynta ngi la ïohi bun ki jaka jong ngi lah thied da ki Company bad ki Bar jylla haka kyrteng ki trai muluk. Kane ka buh ka jingma kaba khraw ïa ka Jaidbynriew jong ngi.
Ban kam ba ngi dang lah ban long trai Ha la ka Ri lajong nga sngew ban ong ba ngi lah bakla, namar mynta sah satang ha kyrpong ïing lajong hi ba ngi dang lah ban kam ba ngi dang long trai hynrei kiwei kiwei ki kam lah long trai da u bar jylla suda .
Lada ngi phai sha ka KHAïI KA PATENG, ngi ïohi ba la knieh lut u Mynder shi sngi. U mynder u shong ha ki ïing paki Dulan, katba ki Khasi pat ha ki Madan bad ki jaka ïaid kjat (footpath).
ïa ki mar rep kiba wankit sha ïewduh bad sha kiwei kiwei ki ïew na kylleng ki shnong, dei u dkhar Marwari ba buh dor ïa ki nongrep jong ngi, u khniot katba u mon, bad ka dor katba u sngewbit u shim. Ki nongrep bapli jong ngi ki shu hun katba buh dor u Marwari khaïi jhur namar ba lada ym ai ruh , u jhur u shu pyut ei. Kiwei ki jaidbynriew kiba wan shangkai shapoh ka Jylla jong ngi ki la ong ba pleng kata ka Ri Khasi ki nongshong shnong ki dei ki Dkhar suda namar lada sah Hotel ruh la pynïaid da u dkhar, leit thied jingthied ha ki dukan ruh la die da u dkhar, ym lap dukan Khasi shuh khamtam ha Khyndai Lad.
Haba phai pat, sha ka KAM SORKAR , ngi ïohi ba la bat lut u Mynder, la haki kam pulit, kam ophis khamtam haki Bank ngi la ïohi ba dap da u dkhar suda. Ki post ba heh ba heh lah bat lut u Dkhar u Lyngkien , na kata ka daw u dkhar hi u ailad tang ïa u para dkhar hi ban trei haka ophis jong ki. Dang hakine ko khyndiat sngi nga dang shu dep ïohi ha ki kotkhubor ba ka KHNAM ka dang pyrshah ïa ka jingpynbna khot thep kam ka NEIGRIMS, ha kaba na ki 264 tylli ki post la ai bhah tang 17 tylli ïa ki ST. Kane ka jingleh ka NEIGRIMS ka pynduh lad ïa ki samla Khasi ban ïoh kam ha katei ka Hospital bah.
Ha ki FACTORY CEMENT COMPANY ruh la ïohi ba na ka 100% kiba trei hapoh Company, ki jong ngi ki don tang hapoh 10% kata ruh kam barit baria suda. Man ka sngi ki wan tuid ki Mynder na kylleng ki jylla ban wan wad kam sha ki Cement Company, katba ki jong ngi pat katba apply ruh kim juh ïoh shu kut ha kaba phah ap por beit. Kaba sngew phylla ka long ba dei kito ki Local Director kiba long ki dalal ki Company hi kiba ym ailad ïa ki para Khasi ban trei ha ki Company.
U PUD U SAM, la ïohi ba ngi dang shah knieh shah knieh katba dang ïaid ki por. Lah lut ki khappud pynthor na border Bangladesh, mynta shah knieh na border Assam. Dang hakine ki bnai ngi la ïohi ba ki heh ka Karbi Anglong kila wan kam pud shaduh ka Wah Myntang. Ynnai ong sha kiwei kiwei pat ki jaka lei , kum ha Block 1, Langpih bad kumta ter ter. Ym slem shuh ba ka Ri Khasi Jong ngi kan sah satang ka shynrong suda. Wat ïa u dohnud (Sor Shillong) bah jong ka Ri Khasi jong ngi ruh , ki mynder ki lah long trai lut, peit shaka Them Metor, ngi la ïohi ba ki khar Punjab ki leh meng shisha bad kila nud shisha ban pyni bor wat ïa ka Sorkar jylla bad ruh ïa ki paid ka bri u Hynñiewtrep. Ngi la ïohi ba da u Khar Sikh u ba na Jylla Punjab uba la wan ban tuklar ïa ka Jylla jong ngi .Ban ïa kren lei ïa kita ki ktem shipai, ka pynduh jingkyrmen shisha wat ïa ngi kiba dang ïeng rangbah ban ïada ïa ka jaidbynriew namar kumba ngi la sakhi da lade ba haki Ktem shipai I kumba khambun pyrton ki shipai bad kiba haïing hasem jong ki ban ïa ki Khasi basah ha Shillong. Ka jaka shipai naduh Happy Valley, Laitkor, Shillong Peak, Upper shillong, Laitumkhrah, Polo, Mawroh, Mawiong, Umroi (Bhoi Rymbong), Bishapur, terter ym lah jer kyrteng la tap da ki bar jylla shisha, ka lad ka dei tang lada ka sorkar jylla ka lah ban shimti noh ïa kine ki jaka sha lade ka jaidbynriew ka dang don jingkyrmen. Lada ngi phai sha ki thaiñ South West Khasi Hill naduh Mawsynram, Ranikor, Balat wat shaduh kyndong badon u Uranium ngi ïohi kum ban kam trai lut ki jaidbynriew Garo. Ban ïa kren ïa ka Ribhoi kam don jingmut shuh shaduh kyndong kynshrot ka jaka ba don ka shnong Zero point, kyrdem kulai la ïohi kumba ladei ka Langpih, ka Byrni ruh la Kamtrai ka Assam haduh shilliang ka wah bad ngi ïohi shuh shuh ruh ba u myntri barim ka Sorkar Assam u Tarun Gogoi u lawan thaw ïing shongkai pyngngad haduh ka jaka Khasi jong ngi.
Ha ka SHONGKHA SHONGMAN ruh la ïohi ba la roi ka shongkha khleh, bun satang ki khun shipiah suda, kine ki khun shipiah ki shim lut thik ïa ka dur ka dar ka jingim jinglong na u kpa jong ki bad kaba sngewsih shisha ruh ba ma ngi ki snam KHASI PAKA ngi shah pynïaid kylla ha kine, teng teng ngi ju ïohi ba haba don ka jingïakhih mynder bunsien dei kine ki khun shipiah badon ha u lakam shynshar ki ju dung kylla nadien jong ngi. Kane ka dei dawbah ba kum ka jaidbynriew kam lah shuh ban khie khlieh lada ym lah ban weng namar lada ïakren ïa kiwei ki phang ruh ka ïalam beit sha kane ka bynta hi. Ban shu bsut ïa ka jingkren u wei u rangbah da kaba u Ong “Sngew ban btei ki kynroh namar ka jingkyang ILP ki samla khasi, Bapli ki mih ha surok ban pyrshah mynder, phewse u mynder ba shyllak u ïoh rung syndon ha dpei”. Wat la katta ngim lah ban ïa shim ïathew eh ïa kaba ladep hynrei lada ngi kum ka jaidbynriew ngi don shisha ka jingkitkhlieh ngi hap ban shimkhia kaba nangne shakhmat.
Ka jingkam ba ngi long trai ïala ka Ri lajong ka shu long khlem nongrim namar wat ïa ki thied snam jong ka Ri jong ngi la ïoh kjit da u Mynder Ri.
Haba kumta ngi dang lah mo ban ong ba ngi dang long trai hala ka jong ka Ri, katba ïaki kam ki jam , ka khih ka kamai bad khamtam ki Kur ki jait jong ngi baroh la kamtrai lut lut da u Mynder ri?