Press "Enter" to skip to content

Ka Mawlai Bypass kan weng ïa ka jingdheng kali

Ka jingplie ïa ka Mawlai Bypass ha ka Sngi Saitjaiñ da u Myntri Rangbah ka jylla ha ka jingïadon ryngkat u symbud myntri rangbah, ki myntri sorkar, ki engineer, ki ophisar bad ki riewpaidbah ka la pynkmen ïa ki paid nongshong shnong jongka jylla namar ka jingap khmih lynti ban plie ïa kane ka surok ka long kaba lah slem bah bad ka jingïaroh kam leit tang sha kane ka sorkar ba mynta hynrei ïa ka sorkar ba mynshwa ruh namar la sdang ïa kane ka surok naduh ka por jongka sorkar MUA hapoh ka jingïalam jong u Dr Mukul Sangma bad la pyndep pat da kane ka sorkar MDA hapoh ka jingïalam jong u myntri rangbah u Conrad K Sangma.
Ka jingkhmih lynti jong ki paidbah ka long ba naduh nangne shakhmat ka jingdheng kali kan kham duna noh namar la lait ban thynnian tang na kajuh ka surok ka ban poi sha Mawlai Petrol Pump. Baroh shi katta ki paid nongleit nongwan na kane ka surok bah Guwahati – Shillong ki la ud la lyniar palat namar tang shu poi ha ki thaiñ Mawiong bad Mawlai la sahkut da ki kynta bad ki don ki khep ba ka jingdheng kali ka poi wat shaduh Umiam ruh. Ka jingdheng kali ka jur eh ha ki por mynstep bad janmiet kiba dei ki kynta ba ki briew ki ïabeh sha la ki kam ki jam bad janmiet pat ban leit phai sha la ki ïing ki sem.
Tangba tang kawei kaba kongsan ka long ba ki nongpyndonkam ïa kane ka surok ki dei ban nym sngewsarong ban pynher sted ïa ki kali jongki tang namar ba la ïoh ïa ka surok kaba thymmai bad kylluid namar khlem pep lada niah khlem akor ki jingjia ba sngerwsih ba har rukom kin jia. Ha ryngkat bad kane ka surok ka sorkar ka la plie ruh ïa ka Police Outpost bad ka jingthmu ka long ba ki pulit kin peit ym tang ban lait na ka jingdheng kali, hynrei kin peit ban lait na ki jingpynher sted ban ym jia ki jingaksident bad kumjuh ruh ban peit ba yn ym ïohlad ki riew shim kabu ïa ki nongleit nongwan na katei ka surok ban leh ïa ki kam pyntriem kum ki kam tuh kam lute.
Kaba kongsan eh mynta ka long ba ka dei ban don ka jingïatrei lang kaba jan hapdeng ki pulit jongkane ka Out Post ba thymmai bad ki pulit kiba peit ïa ka jingpynïaid kali na ka surok ba rim namar wei ba la sdang ban don ka jingdheng kali na ka surok kaba rim la dei ban pynïaid beit ïa ki kali na kane ka surok kaba thymmai. Nalor kane wat ki paidbah kiba leit phai sha ka nongbah Shillong kiba ym donkam ban ïaid lyngba ka Motphran ne Police Bazar ki la dei ban rung na kane ka surok bad ïaid beit sha ki surok kiba lam sha ki thaiñ Polo ne Pynthorumkhrah ban mih beit shaduh ki thaiñ Laitumkhrah ne Nongthymmai ruh khnang ba kane kan dang kham pynduna shuh shuh ïa ka jingdheng kali ym tang ha katei ka surok hynrei wat ha ka sor Shillong ruh. Namar bunsien ka jingdheng kali ka jia namar ba ki kali ki hap beit ban ïaid lyngba ka thaiñ Motphran ne Police Bazar hynrei mynta ba la ïoh ïa kane ka surok kaba thymmai lah ban jied ne ïaid ïa ki surok ki ban mih beit sha Mawlai Mawroh bad Golflink.
Kumba ka long hi ka nongbah Shillong ka dang donkam bun ki surok bypass ban pynkylluid bad pynduna ïa ka jingdheng kali shwa kata ka National Games 2022. Hooid mynta ka sorkar ka dang pynkhreh ban shna ïa ka surok bypass ka ban kdat noh naduh Laitkor ban poi beit shaduh ki thaiñ Malki bad kane ka jingthmu jongka sorkar ka long ban ïarap ia ki paidbah ban lait na ka jingdheng kali namar ym lah ban len ka jingthied kali ki briew ka la nang jur man la ka sngi katba ka surok pat ka neh kumjuh kumta da kane ka jingpynkhreh jongka sorkar ban pynbun ïa ki surok bypass khlem pep kan wanrah ka jingsuk ka ïaid ka ïeng jongki paidbah.