Press "Enter" to skip to content

Kylla ahor ktieh ka MP Stadium Tura, lap u Myntri ba suki siang Artificial Turf ha Ampati

Shillong, Nailar 18 : U Myntri ba dei peit ïa ka ka tnad Sports ka sorkar Jylla, Bah Banteidor Lyngdoh, u la pynpaw ka jingsngew khia ban lap ba ka MP Stadium kaba don ha sor Tura, ka la kylla long ka ahor ktieh ba i shyrkhei bha bad kam i long wat tang ban pyndonkam ban ïalehkai phutbol ruh.
Ha ka jingjurip ïa kane ka Stadium, u Myntri u la pynpaw ïa ka jingsngew diaw ba ym shym la don ban peitngor bha ïa kane ka madan ïalehkai bad ka jingtei ïa ka jaka shong paidbah (sitting gallery) ruh ka la long kaba suki palat haduh katta katta.
“Ha ka jingshisha ym dei ban shah rung kali hapoh ka madan khamtam ha ka bynta madan phutbol hynrei ka jingbym biang ki phalor ka la long laitluid ïa ki kali ban ïaid ban ïuh”, u la ong da kaba kdew ba ka bynta pdeng jong ka madan ïalehkai ka long thliew.
U Myntri u la pynpaw ba un sa khot ïa u kontraktor ba pyntrei ïa ka jaka shong ki paidbah ha kane ka Stadium bad kumjuh ïa ki ophisar ban wad ïa ka daw ka jing-pynslem ban pyndep ïa ka.
Da kaba ong ba ka jylla kan pdiang ïa ka National Games 2022 u la pynpaw ba kum kane ka jingïohi ïa kane ka long ka man ka Stadium kam long kaba itynnad bad i don burom.
Kane ka jingleit jurip u Myntri ïa ka MP Stadium ka la long hadien ka jingwan jurip ïa ka madan ïalehkai ha Ampati, South West Garo Hills kaba dang ïaid shaid shaid shaid mynta ban siang Artificial Turf.
“Kane ka madan ha Ampati la mang 4 klur 50 lak tyngka ban siang phlang plastik hynrei ka kam ka sahkut na ka daw ka jingjur u slap bad ka um ka wan kit ïa ka khyndew shyiap ha ka madan bad nga la bthah ïa ki ophisar ba kin shim khia ban shim ki lad ban pynsted ïa ka kam,” la ong u Myntri.
Kine ki jingleit jurip u Myntri kadei hadien ba u la wan ban ïa shim bynta ha ka jingrakhe ia ka lyngkhuh dap 73 snem ka jingïoh laitluid ka Ri India kaba la long ha Ampati, South West Garo Hills ha ka 15 tarik u Nailar mynta u snem.