Press "Enter" to skip to content

Pyni nuksa u Rangbah :Dang lah ban pynkhie im ia ki jaka ba don par dewiong

Khliehriat Nailar 18: Ki phngit dewiong bad ki um ba mih na u dewiong ki dei ka bih bah ba pynjulor ia ka mei mariang bad ka bamduh ia ka jingsboh ka khyndew bad ia ki jingthaw ba im ha ki Wah hynrei uwei u Rangbah na East Jaiñtia Hills, ula pyni ia ka nuksa ba kumno u lah ban pynkhie im biang iaki jaka par dewiong ba kin rben biang da ki khlaw, ki jingthung jing tep wat ban pyndonkam da ka umbih ba mih naki par dew-iong ban ri dohkha.
Une u Rangbah u dei u Bah Self Daniel Lyngdoh uba dei na ka shnong Sutnga bad uba la ioh ruh ia ka khus nam ‘Green Initiative Award’ na ka Tnad Khlaw ka Jylla ha u snem 2016.
Namar ka jingieid ia ka mariang bad ka jingpyrshang ruh ban thaw ia ki lad ki lynti ban kamai hadien ka jingwan ka hukum jong ka National Green Tribunal (NGT) ba khang ia ka jingtih dewiong ha Jylla ha u snem 2014, u Bah Self Daniel Lyngdoh ula prat ia ka lynti ba thymmai ba un pynmih jingkamai bad kane ka lynti ba ula jied ka long da kaba pynleit jingmut ialade ha ka jingthung dieng bad ban shna ia ki pung doh- kha ha kawei ka jaka ba heh kumba 2.85 lak miter, kaba don ha ka shnong Moopala, kaba dei ruh ka jaka ba don haduh 16 tylli ki thliew tih dewiong.
U Mawphor ha ka jing jurip ia kane ka jaka jong u Bah Self Daniel Lyngdoh u la lap ba hapoh kane ka jaka ki don bun jait ki jait dieng kum u dieng Sal, Teak, Cherry Blossom, ki dieng Sandal Wood, ki dieng Agar, ki dieng Puma, Champa, san hajar tynrai ki dieng soh ñiamtra bad kiwei kiwei.
Ka la don ruh ka kper rep slasha kaba heh bad la ïohi ruh ba kane ka jaka ka long kaba seisoh haduh katta katta ha ka rep bad ka ri dohkha.
U bah S.Daniel Lyng-doh ha kaba ïakren bad u Mawphor u la ïathuh “Ia kine ki jait dieng bapher bapher nga la wanrah na shabar ka jylla bad na shabar ri ruh namar nga sngewtynnad bha ban thung dieng bad kumjuh ruh kine ki dieng ki long kiba rem dor bha ha kaba ngan sa lah ban pynïaid ïew ïa ki ynda ki la heh la san bha da kaba ngan sa thung bujli da kiwei pat”U la ïathuh ruh ba u la shim khia ïa kane ka kam thung dieng bad ri pung dohkha dei naduh u snem 2014 hadien ba ka National Green Tribunal ka la khang ban tih dewiong.
Hapoh kane ka jaka jong u ma S.D.Lyngdoh ki don haduh kumba 16 tylli ki thliew tih dewiong kiba la dep tih naduh u snem 2003 bad ka um kaba tuid na kitei ki thliew dewiong la pyntuid sha ki saw tylli ki pung ri dohkha.
Haba kylli,kumno ka um dewiong ka lah ban tuid sha ki pung dohkha,hato ki dohkha ki lah ban im?u bah Self Daniel Lyngdoh u la ïathuh ba “Ia ka um kaba tuid na ki thliew dewiong nga la leh filter system ter ter ha kaba nga la tih ki thliew bun jaka bad nga la buh da ki mawshun ha kaba u mawshun u don ka bor ban pynkhuid ïaka um bad ka um kaba tuid ter ter sha ki saw tylli ki pung ba ri dohkha ka la kylla long ka um kaba bha ha kaba ki doh kha bad ki jingthaw ba don hapoh um ki lah ban im”
U la ong ruh ba bunsnien ki dohkha kim ju iap ha ki par mawshun bad kito kiba mut ban dusmon da kaba wieh dawai ruh kim lah bad ki dohkha kin nym iap satia namar ka jingdon u mawshun.
Kumjuh ruh ha ki pung ba u ri ïa ki dohkha la ong ba u la theh bun ki mawshun ba ka um kan long kaba bha bad kaba khuid.
La lap ruh ba haduh kumba palat shihajar ngut ki paidbah kiba ieid ban khwai dohkha ki la ïa poi ban khwai dohkha na kine ki pung jong u ma S.Daneil Lyngdoh ha kaba u la khot sngewbha pynlong ïaka jingïakop khwai dohkha da kaba u la shim tat dor haduh katta katta ïaka bai tiket bad u la ai khusnam ruh haduh laiphew hajar tyngka sha kiba jop ha ka jingiakop khwai dohkha.
U la ong ruh ba kane ka kam thung dieng ka dei ruh shubynta ban pynnehia ka mariang sawdong ban long ka mariang kaba kup rong jyrgam kaban pynmih i aka lyer kaba khuid.