Press "Enter" to skip to content

Pynkhreh ka Sorkar MDA ban shna kham bun ki surok Bypass ba dheng kali ha Shillong

Shillong, Nailar, 18: Ka Sorkar Meghalaya ka la buh thong ban shna kham bun ki surok Bypass na ka bynta ban weng ïa ka jingdheng jong ki kali kiba thmu ban wan rung sha ka nongbah Shilong.
“Bun na ki paidbah ki shu kylla langkñia ha ki jingsahkut kali da ki phew kynta tang ban wan rung sha nongbah Shillong. Ka jingdheng kali ka dei kawei na ki jingeh kaba buh ïa ka Sorkar bad ïa ka tnat Pulit ha ka shyngkan khait. Ka Sorkar mynta ka la pyrshang ban thaw ïa ki lad ki lynti kumno ban weng ïa kine ki jingeh khamtam ha kaba ïadei bad ka jingdheng kali,” ong u Myntri Rangbah ka Jylla u Conrad K. Sangma haba kren ha ka jingïalang plie ïa ka surok Shillong-Mawlai Bypass hynnin ka sngi.
Haba pynpaw ba ka Sorkar ka don jingthmu ban shna kham bun ki surok Bypass ban weng ïa ka jingdheng kali, u Conrad u la ïathuh ba dang shen u la leit jurip hi dalade ïa ka surok naduh ka shnong Mawmaram kaba pynïasoh ïa ka shnong Mawmih ïa ka Union Christian College (UCC) haduh North Eastern Police Academy (NEPA).
“Nga kyndit haduh katta katta ban ïohi ïa ka jingitynnat jong ki lum ki them haba nga ïaid lyngba jong kane ka surok kaba pynïasoh sha Nongstoiñ. Ki paidbah kiba kwah ban kiar ïa ka jingdheng kali ha nongbah Shillong ki lah ban pyndonkam ïa kane ka surok tad haduh ban da shna thymmai da ka surok Western Bypass,” la ong u Conrad.
U Myntri Rangbah u la ïathuh pynsngewbang ruh ïa ki paidbah ba na katei ka surok ba don halor lum ba wan na Mawmaram lah ban ïohi kyndiang ïa ka jingithiang jong ka Pung Umïam bad ïa ka jingithiang jong ka nongbah Shillong na ka shnong Mawmih.
U la ïathuh ruh ba ki nongwan jngohkai nabar ka jylla kin ïohi ïa ka jingithiang jong kine ki jaka ynda ki la ïaid lyngba kane ka surok.
“Ïa ka DPR ladep pynkhreh nadong shadong ban maramot ïa kane ka surok. Tang hapoh khyndiat bnai, ngi khmihlynti ban plie noh ïa kane ka surok na ka bynta ban ailad ïa ki nongwan jngohkai pyrthei ban ïaid lynti. Kane ka surok kan ïarap ruh ban weng ïa ka jingdheng kali ha ka nongbah Shillong namar ki nongwan jngohkai pyrthei kiba thmu ban leit sha Sohra kim donkam shuh ban dang wan rung lyngba ka nongbah Shillong,” la ïathuh u Conrad.
Ha kaba ïadei bad ka surok Western Bypass, u Conrad u la ïathuh ba ka tnat PWD jong ka Sorkar Jylla ka la dep pynkhreh ïa ka DPR bad ïathuh ruh ba ka Sorkar ka khmihlynti ban sdang noh mardor ïa kane ka kam hapoh khyndiat por.
Kum ban shu kdew hangne, ïa ka jingjurip ban shna ïa ka surok Western Bypass la pyndep nadong shadong da ka kompeni kaba ïoh ban pyntrei ïa kane ka projek.
Kane ka surok ar laiñ jong ka Western Bypass ka dei kaba jrong 42 kilomitar ïa kaba la mang pisa T. 258.37 klur.
Hynnin ka sngi saitjaiñ, u Myntri Rangbah u la plie ïa ka surok Shilong-Mawlai Bypass ba la pyntrei ha ka jingpynlut kaba T.27.87 klur ka ban weng ïa ka jingdheng kali kumba 30 percent eiei naduh Mawlai Mawiong shaduh Garikhana ha shilynter ka surokbah Shillong-Guwahati.
U Myntri Rangbah u la ong ba ka jingplie ïa ka surok Shillong-Mawlai Bypass kan ïarap ban khate ïa ka jingdheng kali ha kaba ym tang ki paidbah nongshong shnong ka nongbah Shillong kin ïoh jingmyntoi hynrei kane ka surok kan ai jingmyntoi ruh wat ïa ki briew kiba wan nabar ka Jylla.