Press "Enter" to skip to content

Pyrshah ka HYC ba pyllait ïa ki ‘Industrial Area’ na ki ADC

Shillong, Nailar, 18: Ka Hynñiewtrep Youths Council (HYC) Seng Kmie ka la pyrshah jur ïa ka jingpynbna (Notification) ba la pynmih da ka Directorate of Commerce and Industry jong ka Sorkar Jylla kaba kdew ba ki “Industrial Area’ kim hap shuh hapoh ka jingpeit jingkhmih bad hapoh u pud u sam jong ki Autonomous District Council (ADC) ne kim hap shu hapoh ka Sixth Schedule lane kim dei shuh ki Tribal Area bad nalor kata ba kim hap shuh hapoh u pud u sam jong kano kano ka ha u Dorbar Shnong ne ka Dorbar Hima bad Elaka.
“Kane ka jingpynbna (Notification) ka long kaba bakla bad ka bym lah ban pdiang. Baroh ngi tip ba ka Paragraph 20 jong ka Sixth Schedule ka batai ïa kita ki Tribal Area bad ha ka rilum Hynñiewtrep hi baroh lait noh ka normal Shillong (3 tylli ki Ward kum ka Kyndailad, Jail Road bad ka European ward) bad ki Cantonment Area ki dei ki Tribal Area. Tang namarba ka Sorkar ka thied ne shim ïa kine ki jaka kam mut ba kim dei shuh ki Tribal Area,” la ong ka seng ha u kyrwoh ba la phah da u Vice President ka HYC, u samla Rhembor G. Saibon.
“Imat ki briew kiba saiñ thala ïa kane ka Notification ki don ka jingthmu ban ïohnong shimet bad ki kwah ban ïohnong rhah da kaba ki Non Tribal kin khaii bad bylla laitluid khlem ka Trading License lane Labour License,” la kynthoh ka seng.
“Ka seng ka pyrshah jur ïa kane bad ngi kyntu ïa ki Autonomous Distict Council ba ki dei ban dawa na ka Sorkar ba ka dei ban weng noh ïa kane ka jingpynbna mardor,” ong shuh shuh u kyrwoh.