Press "Enter" to skip to content

Buh jingkylli u Heh NPP ba kam jingjop ka Sorkar MDA na ka kam khang tih dewiong

‘Dei ka jingjop ki Nongtih Dewong Hehspah na ka hukum ka SC’

Shillong, Nailar 19: U Chairman ka Khasi Hills Autonomous District Council (KHADC) bad Heh ka National Peoples Party (NPP) Bah Pynshngaiñ N Syiem, ula buh dak jingkylli halor ka jingkam jong ka Sorkar Meghalaya Democratic Alliance (MDA) ba lam khmat da ka NPP, ïa ka jingjop jongka Sorkar na ka jingweng noh ka Ïingkashari Supreme Court ïa ka hukum khang tih dewiong jong ka National Green Tribunal (NGT).
U Bah Pynshngaiñ uba bat kum u General Secretary ka NPP ba khmih ïa ka Khasi bad Jaiñtia Hills, ula ong ba ka hukum jong ka Ïingkshari Supreme Court ka dei ka jingjop tang jong ki Nongkhaii dewiong ba hehspah (big players) ym jong ki riew paidbah ne ki nongtih dewiong ba rit ba ria.
Ka Ka Hima Nongstoin Land Owners Coal Traders and Producers Association (HNLOCT&PA) ha ka 7 tarik Nailar, kala pyn kup burom ïa u Myntri Rangbah ka Jylla Conrad Kongkal Sangma, ïa u Symbud Myntri Rangbah Bah Prestone Tynsong, ki Myntri Sorkar bad MLA ka Nongstoiñ Bah Macmilan Byrsat haba ai burom ïa ki halor ka jingweng noh ka Ïingkashari Supreme Court ïa ka hukum khang tih dewiong jong ka NGT kaba treikam naduh u bnai Ïaiong 2014.
Ka Ïingkashari Supreme Court ha ka hukum ba ka pynmih, kala weng ïa ka hukum jong ka NGT haba pynksan ba ka khyndew ka shyïap ka dei ka hok longtrai da ki paidbah ka Jylla hynrei kala ong pat ba ka jingailad ban tih biang ïa u dewiong ka dei ban ïaid kat kum ka MMDR Act.
“Kaei ka jingjop bad jingmyntoi ïa ngi..haei kata ka jingjop. Ka khyndew kam dei ka jingkylli, ka jinglong trai kam dei ka ishu, ki marpoh khyndew ki dei jong ngi” ong u Bah Pynshngaiñ haba bynrap “Ngi khlem ialeh mukotduma ban long trai khyndew, khlem ialeh mukotduma ban long trai par hynrei ngi ialeh mukotduma ban lait na ka NGT bad ban lait na ki Aiñ ka Sorkar Pdeng”
Kat kum ka jingong jong u “Ka NGT ka dang don hangne bad ka dang treikam, mynta ngi hap ban bud ïa ka MMDR Act jong ka Sorkar Pdeng. kaei kata ka jingjop, shaei ka lashai jong ki paidlang paidkar”.
Haba mynjur ba ka hukum jong ka Ïingkashari Supreme Court kam don jingïapher satia bad ka hukum jong ka National Green Tribunal (NGT) haban ailad biang ban tih dewiong ha Jylla, u Bah Pynshngaiñ ula ong “ Ka Jylla kan hap ban ïaid mynta kat kum ka MMDR Act. Lada ngi donkam ban tih dewiong ngin hap ban pynkhreh ïa ka Mining Plan bad wat u Trai par un nym lah ban aiwai ïa ka par jong u khlem da ïoh ïa ka jingmynjur jong ka Ministry ba dei khmih jong ka Sorkar Pdeng”.
‘Hangne ngi sngewthuh ba ki nongtih dewiong ba rit ba ria ki jong ngi, ki riew paidbah ba treikam dewiong kin nym lah bor ban leit shaduh ki Ministry ka Sorkar Pdeng ban ïoh jingmynjur ïaka Mining Plan, ban thied par dewiong kiba heh bad wat ki kor machine ban tih dewiong. Ka hukum hi kan pynim tang ïa ki nongtih dewiong kiba heh spah. Ka dei ka jingjiop jong ki ym ka jingjop jong baroh (ki nongtih par kat kum ka jingkot bor” ula ong.
Haba pynpaw ba ka jingpyllait ïa ki Aiñ ka Sorkar Pdeng ka don jingïapher, ula ong “Lada la pyllait noh ïa ka Jylla na ka MMDR Act, ka Sorkar Jylla ka lah ban thaw ïala ka jong ka Mining Policy kaban shna ha kata ka rukom ka ban iarap kat kum ka rukom tih dewiong hangne ha kaba ki nongtih dewiong naduh kiba rit ba ria haduh kiba hehspah kin lah ban toh dewiong”.
Haba kylli ïa ka jingïapher ka rai jong ka Sorkar barim ka Jylla ban ai lilam ïa u dewiong ha ka MMDC bad ka hukum jong ka Ïingkashari Supreme Court ba phah lilam ïa u dewiong ha ka Coal India Limited, u Bah Pynshngaiñ ula ong “Kat kum kane ka hukum , dei ma ngi kiba duhnong. Jin dalaa ngi don la ka jong ka Agency, ka jingïohnong kan dang dei jong ngi hynrei mynta ka jingïoh nong ka leit sha ka Coal India Limited. Wat ka pisa ruh kan shong hangne hynrei mynta ka pisa ka leit ei shabar”. U ong ba ka hukum jong ka Ïingkashari Supreme Court ka don shibun bah ki jingduhnong ïa ka Jylla.
Une u MDC ka Mawkhar-Pynthorumkhrah ula pynpaw ruh ïa ka jingsngew ba u CEM ka KHADC Bah Teinwell Dkhar ula dei ban khot noh ïa ka jingïalang jong baroh ki MDC ban ïasyllok biang halor kane ka kam namar ka hukum jong ka Ïingkashari kan sa ktah ïa ki riew paidbah.