Press "Enter" to skip to content

Khang tala ka HANM ïaka toll gate ka NHAI ha Ialong bym maramot ïaka surok NH 6

Jowai, Nailar 19: Ka Hynñiewtrep Achik National Movement (HANM) da ka jingbitar halor ka jinglehbymsuidñiew ka NHAI ban maramot ïaka surok bah NH 6 kaba la jot rathai ha shilynter jong ka khamtam haka thain East Jaiñtia Hills District kala leit ban khang tala syndon ïaka khyrdop lum pisa (toll gate) kaba don haka shnong Ialong haka sngi Nyngkong.
Ka HANM kala kynnoh ba NHAI kala shu lum pisa ha ki ar tylli ki khyrdop haka shnong Ialong, West Jaiñtia Hills bad ha ka shnong Lumshnong, East Jaiñtia Hills District katba ka surok pat kala jot rathai kaba la dap da ki thliew ki syar kam shym la maramot kaba la wanrah ka jingma ïaka ïaka iaid ka ieng ki kali kumjuh ki nongshong kali bad ki briew ba ïaid ba ieng ha surok khamtam ha ki jaka paidbah bad ba don ki skul.
“Namar ka jingleh kuman ka NHAI halor ka jingud jingnam u paidbah, ngim banse ban leit khang tala syndon ïa katei ka khyrdop ban ai jingsneng ïaki nongpyniaid namar ba kim khein snep ïaka jingim briew,” la ong u nongalam ka HANM Shaniahlang Suchen bad bynrap ba ngi dawa mardor na ka NHAI ban shna ne maramot ïaka surok bah namar la bun bun sien kala jia ka aksident ha kane ka surok kaba pynïasoh ruh ïaka jylla Assam, Mizoram, Tripura.
Ka HANM kala dawa ba ka NHAI ka dei ban maramot shuwa ïaka surok, khnang ban suk ka ïaid ka ïeng ki kali bad kam dei ban khrong pisa ha kine ki khyrdop tad haduh kala dep ban maramot ïaka surok ban suk ka leit ka wan.
Ha kane ka jingkhang ïa katei ka khyrdop la don ki nongïalam ka HANM na kylleng ki tnad na East bad West Jaiñtia Hills.
Haduh bala thoh ïaka khubor ki nongpynïaid ïaka toll gate kim pat plie ïaka bad kane ka jingjia kala poi sha ki tyndong skhor jong ka bor synshar district West Jaiñtia Hills bad lashai ka sngi kin plie ïa katei ka khyrdop.