Press "Enter" to skip to content

Kular ka Sorkar Pdeng ban kyrshan pisa ïa ka Meghalaya na bynta ka National Games

Shillong, Nailar 19 : Ka sorkar pdeng lyngba u Myntri ba dei peit ïa ka tnad Sports and Youth Affairs, u Kiren Rijiju u la kular ban kyrshan pisa ïa ka Meghalaya ha ka jingpyn-khreh ban pynlong ïa ka National Games ha u 2022.
Ïa katei ka jingkular, u Myntri u la pynpaw ha ka jingkynduh bad ka kynhun ki Myntri Sorkar ba mihkhmat na ka Meghalaya Democratic Alliance kynthup ïa u Bah AL Hek, Bah Banteidor Lyngdoh, MP ka Shillong, Bah Vincent H Pala kiba la kynduh ïa u Myntri Khynnah ha ophis jong ka SAI, New Delhi hynin ka sngi.
La ïathuh ruh ba ha katei ka jingkynduh, u Myntri ka tnad Sports ka jylla, Bah Banteidor Lyngdoh u la pyntip ha u Myntri Khynnah halor ka jingthmu ban shna ïa ka madan phlang plastik ha Meghalaya na ka bynta ban kyntiew ïa ka sap kyrpang jong ka jylla.
Na ka liang u Bah AL Hek, Myntri ka tnad ka Koit ka Khiah ka Jylla ruh u la pynpaw ïa ka jingdonkam ban pynbha bad pynbiang shuh shuh ïa ka madan Shillong Golf Course na ka bynta katei ka lympungbah jong ka Ri.
La ong ruh ba ha ka jingïakren, u Myntri ka sorkar pdeng u la kular bad mynjur ban ïarap na ka bynta ban pynïoh jingkyrshan pisa. Nalorkata, u ong ruh ba halor ka National Games, 2022 ka jylla ka la thung ruh ïa u Project Management Consultant.
Ha kajuh ka por, ki nongkitkam jong ka nongkitkam jong ka North East Olympic Association ruh ki la kynduh lang ïa utei u Myntri ka tnad Sports hynne ka sngi Nyngkong ban ïa kren na ka bynta ka National Games 2022 kaban long ha Meghalaya.
La ïathuh ruh baha ka jingkynduh ha nongbah Delhi na ka liang u Myntri u la ai ka jingkular ban bishar bniah ïa kitei ki jingai jingmut na ka NEOA. Katkum ka kyrwoh la ong ba u Myntri u da ïaroh ruh ïa ka jingïatylli ki Olympic Association na ka thaiñ shatei lam-mihngi jong ka Ri ban kyntiew ïa ka kam ïalehkai.
Shuh shuh la ong ba u la kular ruh ban ïa kren bad u Myntri DONER ban kynthup biang ïa ka phang “sports development” hapoh ka thup treikam jong ka North Eastern Council (NEC), kaba la shah weng khyndiat bnai mynshwa kaba la buh ïa ki kynhun ïa lehkai ha ka jingeh kaba khraw. U la pyntip ba ka tnad Sports ka dang pynkhreh bun ki kam ha kiba bun ki liang ban ïarap kyntiew ïa ki Kam ïalehkai.