Press "Enter" to skip to content

Mynta yn ïakynduh ki Deputy Commissioner ka Jylla bad Bangladesh ha nongbah Shillong

Shillong, Nailar 19: Ki Deputy Commissioner jong ka Jylla Meghalaya bad ka Bangladesh kin iakynduh mynta ka sngi ba-ar ha Nongbah Shillong ban pynlong ia ka jingialang jong ka Joint Border Coordination Committee (JBCC).
Kane ka jingialang kan iakren ia shibun ki mat ba iadei bad ka jingiatreilang hapdeng ka Jylla bad ka Bangladesh kynthup ia ka jingtyrwa ban nang plie shuh ia ki Iew Khappud ha baroh arliang ki shnong khappud khamtam eh halor ka jingdon kam ker sainar shiah ha shi lynter ki bynta khappud.
Kane ka jingialang ka dei kaba la bthah ban pynlong da ka tnad kam poh ïing jong ka sorkar pdeng kaba dei peit ïa kane ka thaiñ. Kane ka jingialang kan long ha Pinewood Hotel, Shillong.
Ia ka JBCC la thaw ha ka jingialang ba nyngkong eh jong ka Bilateral Conference hapdeng ki Deputy Commissioner/Magistrate jong ka Jylla Meghalaya bad ka Bangladesh kaba long ha Nongbah Shillong ha ka 12 bad 13 tarik u snem 2015. Ki Deputy Commissioner na baroh arliang (Meghalaya bad Bangladesh) kila mynjur ba ka JBCC ka dei ban iakynduh la kumno kumno ruh arsnem ha ka shisnem lane ha kano kano ka por ba donkam ba kin iakynduh.
La thaw ia ka JBCC kat kum ka Border Coor-dination Committee jong ki shipai BSF-BGB na ka bynta ban lah pynbeit ia baroh ki jingeh kiba don ha khappud.
Ki District ka Bang-ladesh kiba don ha khappud ka Meghalaya ki kynthup ia ka Sylhet, Mymensingh, Sunamganj, Sherpur, Kurigram, Jamal-pur bad Netrokona. Hynrei na ka liang ka Jylla Meghalaya, ki don haduh 7 District ba don ha khappud ka Bangladesh bad kine ki dei ka East Khasi Hills, South West Khasi Hills, West Jaiñtia Hills, East Jaiñtia Hills, West Garo Hills, South West Garo Hills bad South Garo Hills.