Press "Enter" to skip to content

Ngam ong ‘EM’, tangba ka por kan sa batai : Dr. Ampareen Lyngdoh

Ba bna ban mih noh na ka Congress

Shillong, Nailar 19 : Ka MLA jong ka East Shillong, Dr. M Ampareen Lyngdoh ha ka sngi Nyngkong ka khlem kyntait satia ïa ki khubor kiba la saphriang kylleng ba ka lah ban mih noh na ka seng Congress.
“Ngam ong ‘EM’, tangba ka por kan sa batai. Ngam kwah ban rai kyrkieh halor kane,” ka la ong haba kren bad u Mawphor.
Katei ka nongmihkhmat ka la pynpaw ruh ba shwa ba kan shim ïa ka rai kaba khatduh kan ïaid shwa bad u paidbah uba la pynjop ïa ka ha kine ki elekshon baroh kiba la dep.
Haba jubab halor ki jingkylli, ka la pynpaw ruh ba ki don bun ki daw kiba pynlong ïa ka ban pyrkhat na ka bynta ka lawei ha ka saiñpyrthei khamtam eh halor ka jingsngap jar jong ka party (Congress) ba ka don ha kiba bun ki ishu kiba ktah ym tang ïa ka Ri hynrei khamtam eh ïa ka jylla.
Shuh shuh ka la ong ruh ba kum ka MLA kaba mih na ka constituency kaba ki nongthep vote ki dei ki briew kiba la nang la stad kam kwah satia ban leh lyndet shwa ban shim ïa kino kino ki rai.
“Haba ngan leh ïa kano kano ka kam ngam kwah ba long kum suri kup snieh langbrot hynrei nga pynpaw beit shabar ïa kaei kaba nga don,” ka la ong da kaba bynrap ba kan ym sngew ei ei hi ruh ïa ka jingkynnoh kiba laiphew jait kiba lah ban mih halor katei ka rai jong ka.
Katei ka MLA ka la pynpaw ruh ba ka thrang ban ïohi ba kan don ka bor kaba khlaiñ bha kaban peit ïa ka jinglong kyrpang ïa ka bha ka miat bad ka jingmyntoi jong ki khun Khasi – Jaiñtia. Halor kane, ka pynpaw ba ki donkam ïa ka jingtylli lang jong ki khraw pyrkhat ba kin wan lang ha kawei ka jylli na ka bynta ka lawei jong ka thaiñ bad ka jylla hi baroh kawei.
Nalorkata, ka ong ruh ba ki don bun ki ishu bad ki jingjia kiba la ktah bha ïa ka jingmut jingpyrkhat jong ka khamtam haba ïadei bad ki ishu kiba ktah ïa ka jylla.
Shuh shuh ka la ong ruh ba ka rai ba kan shim kan dei ruh shi bynta ha ka jingpynkhreh na ka bynta ka samoi elekshon kaban wan ha u 2023.
Ka jingkylli kaba mih ka long hato ka Dr Ampareen kan leit phai biang sha ka UDP kaba dei ka party ba ka la mih noh mynshwa da kaba hiar shuki hi bad ïakhun biang ïa ka election shiteng samoi na ka Congress bad jop don burom biang ne kan leit rung sha ka NPP. Halor kane ki paidbah ki dang ap kmang ban ïohi shano kane ka riewdap kynthei ne ka nongmih khmat ba radbah kan shim rai.