Press "Enter" to skip to content

Da ka Committee yn thaw u Syiem Raid Marwet ban sumar ïa ki Mawbynna ha Khanapara

Nongpoh, Nailar 21: Kum shibynta ban pynneh pynsah bad sumar ïaki Mawbynna kiba ba don ha Khanapara ba hap hapoh ka Raid Marwet, ha Ri-Bhoi, ki bala thung ruh da ka District Council naduh u snem 2010, naka liang ka ophis u Syiem ka Raid Marwet shen un sa thung syndon da kynhun (Committee) ka ban peit kyrpang ban pynneh pynsah bad sumar sukher ïa ki tei ki maw ba don ha katei ka jaka.
Kum ban pynpaw ba ïa kitei ki Mawbynna la tei haka shnong Khanapara kaba dei ruh ka jaka bala ai sngewbha da ka kong Bankerlyne Rumnong sha ka KHADC naka bynta ban tei ïa kitei ki mawbynna kaba long ym tang ka jingpynsahnam ïa ka jylla Meghalaya, hynrei ka jingthmu ba la ai ia kitei ka jaka ban tei ïa ki Mawbynna ka long ruh shi bynta ban ïada ïa ki pud ki sam ha ka thain Khappud ha Khanapara.
Katei ka jingthmu jong u Syiem ban thaw da ka Committee naka bynta ban pynneh bad sumar kyrpang ïakitei ki mawbynna ka dei ruh hadien ka jingjurip bala pynlong mynta ka sngi da u Paiem Ken Syiem, Syiem ka Raid Marwet, ki nongïalam ka HNYF Northern Region ba kynthup ïa u Edilbert Nongrum General Secretary, Donroy Kshiar Asst. General Secretary, Iaineh Wahlang, ki Seng Longkmie na Khanapara, haka jingdon ryngkat ka kong Bankerlyne Rumnong kaba dei ka trai jaka, namarba ki kwah ba katei ka jaka kan long kum ka jingsahnam bad ïada ruh ïa u pud u sam ha katei ka thaiñ khappud.
Ha katei ka jingleit jurip naka liang ka seng kila kwah ruh ban pynkynriah noh ïa kitei ki mawbynna na katei ka jaka namar kumba long mynta katei ka jaka ka long kaba khapngiah bad kah da ki dukan, hynrei ban buh noh ïaki ha kawei pat ka jaka kaba kham kylluid.
Dei halor katei ka nongrim ba naka liang u Syiem kum ka jingpynsah nam ïa kitei ki mawbynna bala buh nam da ka District Council naka liang u Syiem un sa thaw syndon da ka Committee ka ban peit kyrpang ïa kitei ki maw khnang ba kin nym duh bad jot noh, hynrei kin ïai sahnam pateng la pateng bad long kum u pud ban ïada ïaka Ri Khasi jong ngi.
Kane ka Committee kan peit ruh na ka bynta ka jingkhuid jingsuba bad khamtam eh ban nym don mano ba leh khlem akor ïa kine ki maw, kumba ka jingthmu ka long ban pynpaw ïa u pud u sam jong ka jylla.