Press "Enter" to skip to content

Ïashrut u Head Cardiology bad u Director haduh jaka pynïeng kali

Kylla langkñia ei ki Security ha NEIGRIHMS

Shillong: Ka jingbym ïadei jingmut ne ka jingïakynad hapdeng u Director ka NEIGRIHMS bad u Head ka Cardilogy Department ha NEIGRIHMS, imat kam dei tang ha ka jingïatreikam ha ophis, hynrei ka la poi haduh ka jaka pynïeng kali hapoh katei ka Hospital ruh.
Katkum ka khubor kaba la ïoh la ong ba kine ki arngut ki heh jong kane ka Hospital, kila poi shaduh u pud ban ïaknieh wat ïa ka jaka pynïeng kali ruh.
Ha kawei na ki phyllaw ha NEIGRIHMS la buh ban pynïeng ïa ki kali jong ki Ophisar bad la buh ruh da ki signboard, ba la thoh “Parking for Director”, nangta “For Deputy Director” bad kumjuh ruh ka jong u Dean. Hynrei ha katei ka jaka ba la buh ban pynïeng kine, la wan pynïeng ruh u Head jong ka Cardiology. Haba u Director u la wan bad lap ba la pynïeng da u Head ka Cardiology ha ka jaka jong kitei, ki nongap pahara ki la shah kynhied bad don ruh kiba la shah sospon.
Na ka liang kiba tip bha ïa kane ka jingjia, ki pynpaw ka jinglyngngoh ba kumno kin shah pynshitom pynban ki Security haba ka jingïadait ïashrut kadei hapdeng kiba heh. Ka lad khubor ka ïathuh ba kine ki Security kim nud satia ban pyneh ïa u Head ka Cardiology haba u wan ban pynïeng ha ka jaka jong u Director, namar udei u ophisar bad ma ki, kidei tang ki nongap pahara.
Kine kiba la lap ïa kane ka jingjia ki pynpaw ka jingsngewkhia ba namar ka jingbym ïadei ki ophisar ha ka kyrdan ba kham heh, kiba ngat ne kiba long langkñia dei pynban kiba rit baria.