Press "Enter" to skip to content

Ka ‘Kenkba’ ha Nongstoiñ, ka jaka ba khring ïa ki riew ieit mariang

Donkam ïa ki nongpeit nongjngoh ban pynlong ‘Tourist Spot’

Nongstoiñ, Nailar 21: Ka West Khasi Hills ka shlei kyrhai bha ki jaka jngoh kai pyrthei. Hynrei ki jingpyrshang jong ki bor ba dei peit ïa ka kam jngoh kai pyrthei ban pynbha pynitynnad, kan urlong tang lada ki trai jaka trai khyndew bad ki bor shnong, kin ïatreilang bad ai ka jingkyrshan.
Napdeng kiba bun ki jaka ba itynnad jong ka mariang, ka Kenkba kaba don jan bha na Nongstoin harud ka surok bah by pass jong ka National Highway Shillong-Nongstoiñ-Tura, kaba jngai tang katto katne kilometer na Nongstoiñ, ka dei kawei ka jaka kaba la khring bha ïa kiba bun ki riew paidbah kiba ïaid lynti lyngba kane ka surok bah bye pass.
Naduh ba la shna pyndep ïa kane ka surok bah, kiba bun ki nongïaid lynti haba poi ha kane ka jaka ha ki sngi ba ka suiñ bneng ka itynnad, kim lah ban khlem da hiar shwa na ki kali ban peit kai ïa ka jingitynnad ka mariang ha katei ka jaka bad ban shon dur.
Ha ki bnai tlang lei lei, kane ka jaka ka dap da ki nongwan bam khana kata la ka long na kiba na Nongstoiñ ne wat kiba nabar ruh. Man ka tlang la ïohi ïa ki khynnah skul ryngkat ki nonghikai, ki samla pule na kylleng ki jaka bad wat shi ïing shi sem ruh ki poi sha katei ka jaka ban pynlut por lada ka long tang shi kynta ne ar kynta ruh. Ka daw ka dei namar ka jingitynnad, ka jingkylluid ka jaka bad ka jingdon ka wah kaba khuid khlir khlir kaba tuid marjan bad katei ka jaka.
Hynrei haba la bha briew lypa, donkam pat sa ka airong ai rup ban ktik shuh shuh ïa ka dohnud ki nongleit nongwan. Kumta kaei kaba donkam ka long ba ki nongsynshar shnong kiba long mar khappud bad katei ka jaka, kum ka Mawrusyiar, Porsohsat bad Sohpian, kin ïatreilang bad ban tynruh wat sha ka tnad ba dei peit ba kan thaw ki lad ki lynti ban pynbha pynitynnad shuh shuh ïa katei ka jaka kaba la itynnad lypa bad kane kan ïarap pynïohnong ruh wat ïa ki trai shnong ha kiba bun ki bynta.
Nalor nangta ka jingïatreilang jong ki shnong ka long ruh ban peit ïa ka jingkhuid jingsuba bad ka jingshngaiñ jong ka