Press "Enter" to skip to content

Ka Lachain, ka dawai kynbat ba sumar jingpang kynthei bad ka jhur ba bang bam

Jowai, Nailar 21: Ka Lachain (Curcuma aeruginosa), ka syntiew khlaw kaba wan na ka longïing jong u sying bad u shynrai, hynrei ka dei pat ka jingthung kaba long dawai kaba kongsan ïaka jingpang ki kynthei bad ka bang bha ki briew ban shet na ka bynta ban bam ryngkat bad ka dohkha bad da kaba khleh.
Ka Lachain (kaba la tip haka ktien Pnar) kadei ka jingthung kaba long dawai bad bun ki nongai dawai kynbat ne Khasi ki pyndonkam ban sumar pynbha ïaka sniehdoh bad ïaki kynthei kiba la iaw ka rta kiba bym kha bym pung shuh kumjuh ruh kiba dang shu dep kha khun.
Ka Lachain kadei ka jingthung kaba kynrei bha ha kane ka thain jong ngi ha u bnai Lber, Iaiong haduh u bnai Jymmang, Kane ka jingthung ka phuh syntiew shuwa ba kan mih sla kaba jrong. Ka mih napoh khyndew kumba long ka u shynrai bad ka sla ruh ka iasyriem bad ka sla shynrai.
Ïa kane ka jingthung la ban ïoh ha kylleng Rilum Khasi Jaiñtia. Bunsien ki nongshong shong ki ïoh ïa kane ka jhur ha iew ha hat bad pyndonkam ïaka ha ban shet jhur bad phon na ka bynta ban khleh ryngkat nei iong bad neilieh.
Sha kiwei kiwei ki ri kum ka Thailand, Indonesia, Malaysia bad kiwei kiwei ki pyndonkam bha ïa ka kum ka Dawai. Ha Ri Malaysia kila rep ïa kane ka jingthung na ka bynta ban shna dawai.
Kane ka jingthung lah ban lap ïaka haruh ki wah, ki khlaw bad haki jaka phlang. Sha kiwei kiwei ki ri ïaka Lachain la pyndonkam ban sumar ïaka jingthud ka rukom poi bnai ki kynthei, ka dawai kyoh, ka jingpang thud ka ring pynhiar mynsiem bad ka jingpynduna ïaka sngaid bad kiwei kiwei, hynrei ha kane ka rilum Jaintia ïa kane ka jingthung bunsien ngi shu shet jhur ia u syntiew namar ba u syntiew ulong uba shngiam ban bam.