Press "Enter" to skip to content

Kurup ka HYC Shillong City ïa u Choco Dose na ki dukan ha Ïewduh

Shillong, Nailar, 21: Ka Hynñiewtrep Youths Council (HYC) Shillong City mynta ka sngi balang ka la hiar khynra ïa ki dukan ha Ïewduh, Shilllong hadien ka jingïoh ujor na ki paidbah ba ki don ki dukan kiba pynïaid ïew ïa u Choco Dose u jingbam Chocolate uba la saiñdur ha ka dur u Injection ka la kurup bad maham ruh ïa ki trai dukan ba kim dei shuh ban dang die bad ban pynïaid ïew ïa une u jingbam.
Ïa kane ka jingkhynra la ïalam da u President ka seng u Bah John Lyngdoh.
“Hadien ba ngi la ïoh ujor na kiba bun ki kmie ki kpa ngi la pynlong da ka jingleit tohkit ban ïohi ïa ka dur jong une u jingbam bad kaba lyngngoh shisha ban lap ba ka kompeni shna jingbam chocolate ka la saiñdur ïa une u jingbam ha ka dur jong u Injection,” ong u Bah John.
“Ka jingsaiñdur jong ka kompeni ïa une u jingbam Choco Dose ha ka dur u Injection ka long kumba pynshlur pynban ïa ki khynnah kumno ban pyndonkam ïa u drok ïa kaba ka jylla ka la mad mynta ïa ka jingeh halor ka jingkhynrei jong une u jingdih pynbuaid uba la pynjot ïa kiba bun ki khynnah bad ki samla shynrang bad kynthei,” u la bynrap.’
Ka seng ha kane hi ka sngi ka la kurup noh ïa une u jingbam na baroh ki dukan kiba die ha Ïewduh bad ka la maham ruh sha baroh ki trai dukan dukan la ki dei kiba don hapoh u pud u sam ka Ïewduh ne ha ki shnong ki thaw ba kim dei ban buh lane ban die sha ki khynnah ïa une u jingbam.
“Lada lap ïa kiba leh pyrshah ïa ka jingmaham, ka seng kan leh da leh tyngeh ïa ki trai dukan,” la ong u kyrwoh na ka Seng.