Press "Enter" to skip to content

Kyntait u MLA ba dei ka ‘Vote Bank’ ba dawa pynrung ST ïa ki Lalung

Shillong, Nailar 21: U MLA ka National Peoples Party na Mawhati Constituency Bah Dasakhiat Lamare, ula kyntait ïa ka jingkynnoh ba ka jingdawa ban pynrung Schedule Tribe (ST) ïa ki Jaidbynriew Lalung ka dei tang namar ka ‘Vote Bank’.
“Ka jingkynnoh ba kane ka jingdawa ka dei tang namar ka Vote Bank bad ba ngam burom ïa ka bhah jong ki trai paid riewlum (Khasi-Pnar-Garo) ka long kabym shisha bad ka ba ïalam bakla” ong u Bah Dasakhiat haba ïakren bad ki nongthoh khubor hynne ka sngi balang.
Kane ka jingpynshai jong une u MLA ka long halor ka jingkynnoh ba dang shen jong u MDC ka Nongthymmai Constituency Bah Latiplang Kharkongor haba pyrshah jur ïa ka jingdawa ban ithuh noh ïa ki Lalung ha ka thup Schedule Tribe ka Jylla.
U Bah Latiplang ula kynnoh ba kane ka jingdawa jong u MLA ka Mawhati uba dei ruh u Chaimran ka State Development Reforms Commission (SDRC), ka dei tang ka buit Politics ban ïoh vote
Haba kynthoh ïa kane, u Bah Dasakhiat ula ong “Nga burom ïa ka jingsngew jong u (Latiplang) hynrei nga kwah ban pynshai ba ngam don satia ïa kano kano ka jingthmu kaba sniew haba dawa ban ithuh lang ïa ki Lalung kum ki ST ka Jylla kumba ïoh kiwei pat ki paid riewlum nalor ki Khasi-Pnar bad Garo”.
Kat kum ka jingong jong u, hadien ba ula shah jied kum u Nongmihkhmat ka Constituency, ka dei ka kamram jong u ban pyn sngew ïa k ka jingangnud jong ki paidbah sha ka Sorkar Jylla.
“Nga shu pyrshang ban iarap ban pynurlong ïa ka jingangnud jong ki Jaidbynriew Lalung, kaba la sahteng la slem bha. Ha ka jingshisha, nga khlem ïakynduh ïa u Myntri Rangbah ka Jylla Conrad Kongkal Sangma ban dawa hynrei ban kyrpang ïa ka Sorkar ba kan shong bishar lang ïa kane ka kam” ong une u MLA.
U Bah Dasakhiat u ong ba ki Jaidbynriew Lalung ïa kiba la tip kum ki Tiwa ha Assam, ki dei kiba la shong la sah ha Mawhati Constituency shuwa ba ka Jylla Meghalaya kan ïoh ïala ka jong ka Jylla ha u snem 1972 bad la ithuh ruh ïa ki kum ki Khun ki hajar jong ka Hima Khyrim.
Une u MLA ula pynshai ruh ba ka jingdon jong ki Lalung ha Mawhati Constituency ka kot kumba 4000 ngut ym 8000 ngut kumba ula pynpaw dang shen.
Haba kylli, une u Nongïalam ka NPP ula ong ba ka jingshimkhia jong u ïa kane ka mat ka dei halor ka nongrim ba ki Jaidbynriew Lalung ki dei ki Jaidbynriew ym tang ba la ithuh kumki khun ki hajar ka Hima Khyrim hynrei ki dei kiba la don ruh ïala ka jong ka Raid ha ka Hima ym kumba long kiwei pat ki Schedule Tribe ka Jylla kum ki Mikir, ki Rabha, ki Hajong,ki Kuch ki bym dei satia ki nong shongshnong ka Jylla.
U Bah Dasakhiat u ong ruh ba ka jingtyrwa bala phah sha ka Sorkar Jylla kam dei ruh ka jingtyrwa ka ban btah ïa ka bhah thung kam thungkam ne bhah pule jong ki paid Khasi, Jaiñtia bad Garo. Kat kum ka jingong jong u, ki jaidbynriew Lalung lada ki ïoh ïa ka jingithuh kum ki Sub Tribe, kin nym ktah satia ïa ka bhah thungkam thungkam ba 40% jong ki Khasi-Pnar bad Garo.