Press "Enter" to skip to content

Pynkup burom ka MLCU ïa 663 ngut ki samla pule, kynthup 7 ngut ki Research Scholar

Shillong, Nailar, 21: Ka skulbah Martin Luther Christian University (MLCU) ha ka 12th Convocation mynta ka sngi balang kaba la long ha Windermere Resorts, Umpling, Shillong ka la pynkup burom ïa 369 spah ngut ki samla pule Post Graduate, 663 spah ngut ki samla pule Under Graduate bad ki samla ba pule ha ka Diploma.
Nalor kine, kane ka skulbah ka la pynkup burom ruh hynñiew ngut ki Research Scholar da ka kyrdan Doctor of Philosophy bad iwei iba la ïoh ïa ka kyrdan M.Phil Degree.
Ïa kane ka jingïalang pynkup burom la sakhi lang da u Lat ka Jylla u Tathagata Roy ha ryngkat ka jingïadonlang jong u Dr. Johnny Oommen bad ka Mrs. Mercy John, ki shikurim kiba shakri ïa ki nongpang ha Christian Hospital, Bissamcutack kiba la wan ai ïa ka jingkren bakyrpang sha ki samla pule.
Ha kane ka jingïalang pynkup burom, la ai ruh ïa ka Honorary Doctorate of Philosophy ha ka sobjek Education sha ka Inspector of School barim ka Kong Billiancy Lamare kum ka jingithuh ïa u synniang u bynhei ba la noh sha u sup u thiar jong ka pule puthi bad khamtam eh ka jingpynsdang ban pynshong skul ei ïa ki khynnah kiba wan na ki longiing kiba duk da ka jingïatreilang bad ka Seiñ Jaiñtia.
U Lat ka Jylla haba kren kum u Kongsan u la ai khublei ïa ki samla pule bad ïa ki bor pynïaid jong ka skulbah bad u la pynkynmaw ruh ïa ki samla pule ba ka jingshong skul kam dei satia tang ban shu ïoh kam hynrei ban kiew sha kiwei pat ki kyrdan kiba thymmai ha ka jingim.
Ha kane ka jingialang pynkup burom, ka Mercy John bad u Dr.Johnny Oommen ki la ai ia ka jingkren bakyrpang sha ki samla pule ha kaba iadei bad ka pule ka puthi.
Mynta u snem, sa ngut ki samla pule barim ki la ïoh pdiang ïa ka khusnam namar u synniang u bynhei ba ki la noh ha ki kam bapher bapher.