Press "Enter" to skip to content

Pynkynmaw ka UDP ïa u CM halor jingangnud distrik u Dr. Donkupar

Ïaroh ba kyntiew kyrdan ïa ki surok bad Border Haat
Shillong, Nailar 21 : Ka United Democratic Party (UDP) hynne ka sngi Balang ka la pynkynmaw biang ïa u Myntri Rangbah ka Jylla, Conrad K Sangma ba un shimkhia lem ban pynurlong ïa ka jingangnud jong u MLA ka Shella, Dr. Donkupar Roy (bam kwai ha Dwar u Blei) uba dei ruh u Lamphang ka Iing Dorbar Thawaiñ ka Jylla ban kyntiew noh ïa ka Sohra Civil Sub-Division sha ka kyrdan District.
Na ka liang u Bah Titos W Chyne uba dei u nongïalam ka party na Sohra bad Shella constituency u la ong, “U Dr. Donkupar Roy ha ka jingïalang paidbah kaba long ha Sohra u la kren shai ba hapoh une u snem dei ban pynurlong beit ïa ka Distrik ha Sohra. Kumta ngi krmen b au Myntri Rangbah un buh jingmut lang halor katei ka bynta.”
Shuh shuh u la ïathuh ruh ba utei u nongmihkhmat ba la jop haduh 7 sien na Shella ha ki khyndiat por shwa ba un khlad noh u la ju pynpaw beit ba mynta u snem ka Sohra ka la dei beit ban ïoh ïa ka distrik.
“U la dep ban pynpaw ban ai sngewbha Kristmas ïa ki paidbah da ka Distrik mynta u snem. Kyrmen ba ka sorkar Meghalaya kan pynurlong ïa kane,” bynrap shuh shuh u Bah Titos ba dei ruh ha kajuh ka por u MDC ka Sohra bad Executive Member ka KHADC.
La ïathuh ruh ba wat ha ki mat ïakhun elekshon (manifesto) jong u Dr. Donkupar kumjuh ruh ha ka jong u, ki la buh hakhmat eh ban dawa kyntiew kyrdan distrik noh ïa ka Sohra civil sub-division. “Ïa kane ka kam manga bad i Bah Don (Dr. Donkupar) ngi la ju kren na ka por sha ka por bad wat ha Iing Dorbar Thawaiñ ka Jylla ruh naduh ki snem ba la dep bad mynta u snem lei u la kren shngaiñ ban pynurlong beit.”
Ha kajuh ka por, la pynpaw ruh ïa ka jingsngewnguh ïa u Myntri Rangbah ka Jylla, nangta ïa u Symbud Myntri Rangbah kynthup kiba la pynpaw ha ka sorkar pdeng ban kyntiew kyrdan noh ïa ka surok na Umtyngar- Sohra-Mawlong-Ichamati-Bholaganj kaba jrong 76.50 kilomitar sha ka National Highway.
“Ban kyntiew kyrdan ïa katei ka surok kadei ka jingïakhun kaba la slem bha jong u Dr. Donkupar namar naduh u snem ba u bat kum u Myntri Rangbah u la shimkhia ïa ka hynrei la kloi ba kut noh ka jinglong Myntri Rangbah. Kum u MLA ha ka liang pyrshah nga ruh nga la kren lang halor katei kajuh ka phang. Ngi sngew ban pynpaw ka jingsngewnguh ïa u Myntri Rangbah bad ki Myntri kiba la shimkhia ïa kane.”
Ha kawei pat ka liang, u Bah Titos u ong ruh ba kum ka party kaba u don ki pynpaw ruh ka jingsngewnguh ïa ka sorkar jylla kaba la pynurlong ïa ka Border Haat ne ka ïew khappud ha Bhologanj namar naduh ka por ba dang im, u Dr. Donkupar Roy u la pyrshang borbah ban wanrah ha katei ka thaiñ.