Press "Enter" to skip to content

Shah kem u Finance Minister barim ka India

New Delhi: Hadien ka jingthwet kaba la neh jan 24 kynta, ki Pulit jong ka Central Bureau of Investigation (CBI) ha ka sngi Balang mynmiet, ki la kem ïa u Myntri ka pla tyngka bad kam pohïing barim ka ri India, u P. Chidambaram. La kem ïa u MP ka Rajya Sabha jong ka Seng Congress na ïing jong u ha nongbah Delhi.
Ka jingkem ka CBI ïa une nongïalam ba rangbah ka Seng Congress kadei hadien ba ka jingtohkit ka CBI ka la lap ïa ki sabut ba u ïa don bynta ha ka jingbamsap ïaka pisa ba wan na shabar ri sha ka lad Company Ladpathai Khubor INX Media ha u snem 2007.
Ki Pulit ka CBI kiba la thwet ïa u Chidambaram naduh hynnin janmiet, kim lap satia u don shaei. Hynne ka janmiet ruh ki la syrtap ïa ka ïing jong u da kaba iew ïa ki kynroh, ïa ka tnum ban peit tuh don hangno.
Hynrei ha ka por 10 eiei, u Chidambaram ryngkat ka jingsynran ki nongïalam ka Seng
Congress kynthup ïa u Kapil Sibal, u Abhishek Manu Singhvi, u la lum ïa ka jingïalang bad ki nongthoh khubor ha ophis jong ka Seng Congress ha Delhi, ban pynpaw ba u shaniah ha ka jingbishar ba hok jong ka ïingbshar. “Ngan ïai ap ïa ka jingbishar ba hok jong ka Supreme Court ha ka sngi thohdieng”, la ong u Chidambaram ha ka jingïakren kaba lyngkot bad ki nongthoh khubor.
Ki Pulit kiba la ïoh jingtip ba u don sha ophis ka Seng Congress ki la beh pynsted sha katei ka ophis, hynrei katba kin da poi, u Chidambaram bad kiwei ki nongïalam ka Congress ki ladep mih bad leit phai sha ïing.
Ynda u la mih na ïing ban leit sha ophis ka CBI, ki padbah ki la mih ha surok ban ïahylla bad pyrta ban kyrshan ïa u. Na ka liang u Rahul Gandhi, u President barim ka Congress ruh u la pynpaw ka jingkyrshan ïa u Chidambaram.