Press "Enter" to skip to content

Hap pyrkhat thymmai ka Sorkar ia ka jingdheng kali

Ka jingdheng kali ka long kawei na ki jingeh kiba kane ka sor Shillong ka ïa kynduh ha kine ki sngi ba mynta wat lada ki trok bad kiwei kiwei ki kali kiba leit sha kiwei ki jylla ki la ïaid na ka Shillong By Pass ruh. Kane ka jingdheng kali ka jur bha ha ka por long skul mynstep bad hadien kane ka jur eh ha ka por wai skul ter ter haduh ka por wai trei ki ophis sorkar. Ym lah ban len hangne ha nongbah Shillong lajan kawei pa kawei ka thliew ïing ka don ym duna ïa ka ar ne lai tylli ki kali.Haba leit trei ne khamtam haba leit on ne shaw skul la sei lut baroh baroh ki kali. Ka surok ka la nang rit bad ki jaka ïeng kali kiba biang ruh ym don satia. Kumta kane ka jingdheng kali ym lah ban len ka la ktah jur ïa ki paidbah khamtam kito kiba beh sha ki kam ki jam bapher bapher jongki.
Ha ki por ba mynshwa, haba dang bun ki skul kiba pyndonkam ïa ki bus ban kit ïa ki khynnah skul, ka jingdheng kali ruh ka dang duna bha haduh katta katta. Namar tang kawei ka bus la lah ban kit haduh 50 haduh 60 ngut ki khynnah skul. Hynrei mynta ba la duna ki bus skul la mih da ki kali rit ban kit ïa ki khynnah skul bad kane ka dei kawei na ki daw bah daw san ba jur palat ka jingdheng kali hangne ha sor Shillong bad wat ha kiwei kiwei ki nongbah jong ki District ruh ha ka por wai skul.
Imat ka por ka la dei biang ba ki skul baroh ha ka nongbah Shillong kin pyndonkam noh da ki Bus skul. Ha ki por mynshwa kiba bun ki skul bus ki dei na ka Meghalaya Transport Corporation, lait noh kito ki skul kiba don la ki jong ki bus school. Hynrei mynta lei lei ym da kham ïohi shuh ba ki MTC ruh kin kit ïa ki khynnah skul hangne ha nongbah Shillong ne sha kiwei ki jaka ruh. Mynta lei lei ba la bun kine ki Bus saw ki skul ki dei ban shim kabu ban pyndonkam da ki bus saw ban kit ïa ki khynnah skul na ki skul bapher bapher. Namar kumba long hi mynta kiba bun ki bus saw jongka sorkar ki la shu ïeng hajuh namar ba la bun palat bad ym lah shuh imat ban pyndonkam ïa ki. Khamtam lei lei ba ki don ki jaka jaka ba ki seng jong ki bus ne taxi kim shah ïa ki bus saw ba kin ïaid.
Lah ban pynkynmaw ha ka por ba i Kong C.Lyngwa i bat kum I SP (City) bad peit ruh ïa ka tnad Traffic nalor ka (operation) i la don ka jingthmu ba baroh ki skul ha kane ka nongbah Shillong ki dei ban buh noh da ki Bus School khnang ban pynduna ka dheng kali. Hynrei tang na ka daw ba ki don ki khun jong ki heh sorkar kiba leit ha ki skul bapher bapher, khamtam ha kito ki skul ba paw bha, katei ka jingthmu ka la pulom noh. Ban da dei ba la pyntreikam naduh kato ka por te mynta kane ka jingdheng kali ka la duna beit. Namar shu mutdur lada kawei ka bus ka kit haduh 50 ne 60 ngut ki khynnah skul, ka mut kumba 40 haduh 50 tylli ki kali kin nym hap ban mih surok ban leit on ne shaw skul. Kane ka la pynduna bha ïa ka jingdheng kali namar tang ha kawei kawei ka skul da ki spah bad hajar ngut ki khynnah skul ki leit skul te lada tang ha kawei ka skul kin don da ki spah tylli ki kali ba leit on bad shaw skul, hato mut dur hi paidbah kane kam dei ka daw bah jong ka jingdheng kali ha ka por step bad ha ka por janmiet.
Baroh ki paidbah ki mad hi ïa kane ba ki kham suk ka leit ka wan tang ha ka por mynstep shwa ban long skul nangta ha ka por mynsngi por ba dang long skul bad long trei ki ophis sorkar hynrei tang shu la dei ka por long skul bad wai skul bad plie ophis ne wai ophis tang katta te la dheng kali beit kat shaba phai ha kane ka nongbah Shillong.
Halor kane ka jingeh ba ki paidbah ki ïa kynduh ka la dei ka por ba ki bor synshar District naduh u Deputy Commissioner, Superintendent of Police bad ki dei ban ïa kynduh bad ïamir jing mut lang bad ïakren noh bad ki bor ba dei peit ïa ka tnad pule puthi bad tnad transport, tnad urban affairs bad kiwei kiwei ba donkam ban pyn khie im biang ban pynïaid beit da ki skul bus na man la ki skul. Kumba long mynta ka jingshong shngaiñ ka la wan phai ha kane ka nongbah bad sha kiwei kiwei ki bynta jongka ri lum Khasi bad Jaintia ruh kumta khnang ba ki paidbah kin nym mad ïa ki jingeh donkam namar kata ban pynïaid biang ïa ki bus ban kit ïa ki khynnah skul.