Press "Enter" to skip to content

“ Ka jingpom pathar ïa ki khlaw ”

S.M.Satar Manik Myrten (Sten

ka jingthang pathar ïa ki khlaw ka jia man ka snem,khamtam eh ha ki bnai tlang, kata naduh u Nohprah u Kyllalyngkot, u Rymphang, u Lber haduh u Iaïong. Kane ka ktah salonsar. Haba ka khlaw ka pluh sha ki thaiñ nongkyndong, ka wanrah jingma kaba khraw shibun, namar ka ding ka pur wat sha shnong sha thaw, kumta ki ïing trep ïing skum kiba sop da u phlang ki kem ding kloi lada ka ding ka ïoh lad ban pur. Kane ka jia da ka jingthang khlem akor jongno re.
Don bun rukom ki daw kiba pynlong ba ki khlaw kin shah thang, ka lah ban dei na ki nongleit nongwan sharum shaneng kiba iwit ïa ka sañium ïa ki sla ïap bad ki dieng rit kiba la ïap. Te, hynrei wat u nongbeh mrad ruh u don la ka jong ka jingmut, u poi thang ïa ki khlaw khnang ba ki mrad, kum ki skei, ki sier kin wan ban bam ïa ka dpei hadien ba la dang shu dep thang. Ha kum kane ka por, ki ïoh ban siat ïa ki mrad. Bad lada ngi kylli ïa ki khynnah ap masi, balei ba ki thang ïa ki khlaw . Khlem pep ka jubab kaba nyngkong eh kin ai ka long.” Khnang ba un mih noh da u phlang thymmai, ba ki jingri kum ki masi ki blang ki shynreh bad ki kulai kin ïoh bam bun ïa u phlang thymmai, u ban pynkdang ïa ki. Hynrei hateng hateng kaba phylla ban lap ka la long ba wat ki nongñiah kali ruh ki ju pynsangeh ïa kali, ki sei ïa u kyndok ban thang.
Haba phai sha ka rukom thang khlaw sha ki thaiñ “War” ka long kaba ima ban peit. Ka ding ka neh da ki taïew bad bun sngi khlem lip, ka ïeng da ki phew phut sha suiñ, i kumba ka kynjoh ïa ka bneng, ha kum kata ka por lah ban ïohi kyndiang ïa ka ding naduh na sha jngai ruh kham tam ha ki lum bajrong. Dei ha kaba kum kane ka por, ki mrad ki mreng ki sim ki doh, ki her krad ki mareh ki phet shispah lum shispah wah ban lait li-mynsiem.
Ka jingjulor ki dieng ki siej ka long ka bym lah batai, ki don bun ki jait siej kiba sdang duh jait. Ki siej heh ki don ar jait ka siej ïong bad ka siej lieh, ïa ka siej lieh la pyndonkam bha ha kaba thaiñ shang thaiñ prah, namar lada thaiñ da ka siej ïong khamtam ïa u prah bad u maleng, u kba u rieh bha, hapdeng u khaw bad haba peh bad kynrih (pynkhuid) khaw. Bun byllai pat ki dieng kiba lada tang shu dei ding ki ïap bad duh jait noh syndon. Nangta don pat ki bym ïap ha kato ka khyllipmat ruh ki ïap stai noh hadien khyndiat por bad don kiba im ruh, hynrei ka ktah ïa ka heh ka san jong ki. Nalorkata khlem da ïakren ïa ki symbai dieng rit, kiba sdang shylluit bad sdang sara, mar synwan ïaid lynti ka ding ki shu tyrkhong beit raw, hynrei ynda ki symbai na ki dieng bah ki hap biang ki sdang sara, katba kin sdang sei shylluit bha, ka ding ka wan biang ban bam duh ïa ki.
Haba phai pat sha kawei pat ka liang kiba ha ka jingïadei bad ki kynbat dawai Khasi, lah ban ong 95% na ki dawai Khasi, ki dei ki kynbat ba ïoh na khlaw na btap, na kito ki thied dieng, ki jyrmi , ki snep dieng, bad na ki mrad ruh. Bun na ki kynbat ki dei na ka ïing jong ki diengrit, te haba ka ding ka wan ban bam, wat lada ki dang jyrngam ki sla ruh hynrei ki ïap la ka ïap noh namar kim lah ban shah ïa ka jingrhem bad jingklang ka ding ba bun kine ki kylla duh jait noh namar ym don ba sumar ïa ki, ha ka jingshah thang kaba jia kha ma-kha man la u snem. Ka jingmih hi na kane ka long ngin lap ba kito ki nongai dawai kynbat kim ïoh shuh baroh khoit kito kynbat kiba dei ban khleh lang ha ka dawai kaba ki ai ïa kiba pang, kumba ngi lap ba dei na kata ka daw, ba mynta ki briew ki kham troiñ ïa ka rukom ai dawai kynbat.
Ka jingduh jait jong ki dieng ki siej bad wat ki syntiew ki skud ruh ka la ktah ïa ka jingitynnad jong ka mariang, ki syntiew kum u tiew dohmaw, u tiew lyngksiar bad kiwei. Don ruh ki jait syntiew kiba long dawai kynbat, hynrei ngi ïohi ba ka jingpynduh pyntroiñ ïa ki, ka long ha kiba bun ki liang, nalor kaba thang, bud sa ka jingdie haïew ha hat, ki briew kiba leit wad na khlaw ki wan die ha shnong. Hato ynda la wanrah sha shnong dang roi hi mo uta u syntiew ? Bad ynda la dei ka por u ïap ruh khlem ki symbai ban mih pli.
Ka jingpynduh ïa ki khlaw ka long ha kiba bun rukom nalor ba thang sa ka rep shyrti, ka thung bun, ka rep sying, rep kba bad kumta ter ter.
Hynrei shuh shuh la ïohi ba wat u nongrep uba puh mohkhiew ha hali ne lyngkha kba u thang ïa ki khlaw. Balei? Ka jubab ba u ai ka long ban ailad ïa u phlang thymmai ban mih khnang ban ïoh phlang ban sop ïing ne ka trep. Don pat kiba ong ba kaba thang khlaw kan beh krad ïa ki mrad ha khlaw kiba pynma ïa ka jingim u briew, kum u khla, ka dngiem,u bseiñ, u hati bad kiwei pat. Te hynrei ka long kaba donkam pat ïa ngi lang ban tip ba ki mrad ki don ka bynta kaba khraw, ha kaba don na ki bynta jong ka met jong ki lah ban shna dawai bun rukom.
Ka long kaba donkam ïa ngi ban peit bniah ïa ka rukom long ka khlaw ka btap. Ha kine ki por ba mynta, ki khlaw ki la stang. Lait noh tang ha ki khep ki khep, don kiba thaw lait kumno re-eh narud baroh sawdong. Don pat ruh ki khlaw kyntang kiba lada don ba thang kulmar, kito kiba leh kumta ki shah trei ha kito ki blei khlaw, kumta ki shu duh ei ïa la ka jingim (ïap).
Ngi ïohi ba don ki khep ba ki khlaw ki shah thang ar sien ar wat ha ka juh ka jaka ha ka shisnem, kane ka kham jia ha kito ki jaka ba don dieng khlaw.
Bad sa kawei pat ka jingjia kaba pynlong ïa ki khlaw ba kin troiñ, ka leit long namar ba u briew mynshua, u ktah ïa ka forest, ïa ka Agriculture, hynrei mynta pat u la ktah ïa ki minerals resources. (Bteng Sla 14)