Press "Enter" to skip to content

Nalor ka nongïalehkai Arm Wrestling pynkup burom ka RBYF ïa ki samla pule

Nongpoh, Nailar, 23: Kum kawei naka thong ban dang kyntiew ïa ka pule ka puthi ki samla ha Ri Bhoi District, ka seng RBYF kum ka seng trai ha Ri Bhoi mynta ka sngi ka la lah ban pynkup burom haduh 10 ngut ki samla ba pas bha ha ka SSLC examination 2019 kaba long ka jingangnud ka seng ban pynshlur ïa ki samla pule ka Ri Bhoi ban kiew ha ka liang ka pule ka puthi.
Ha kane kajuh hi ka sngi ka Seng RBYF ka la pynkup burom ruh ïa kawei na ka nongïalehkai Arm Wrestling ka jylla, ka Kong Margaret Pathaw kaba leit ban mih khmat ïa ka ri India sha ka lympung ïakhun Arm Wrestling ba la tip kum ka International Arm Wrestling championship kaba long ha bnai Risaw mynta u snem ha ka ri Romania.
Ïa kane ka jingpynkup burom la pynlong ha District Library Auditorium Hall, Nongpoh ha kaba u President ba rangbah ka RBYF, u Bah Bipul Thangkhiew u la long u kongsan ban pynkup burom ïa kitei ki samla pule ba pas bha ha ki examination bad kumjuh ruh ka Kong Margaret Pathaw, kaba dei halor ka nam bad ka burom ba ki la wan rah ïa ka District Ri Bhoi.
Nalor ki nonghikai, ki nongshah pynkup burom bad ki kmie ki kpa, la sakhi lang ruh ha kane ka sngi ba la pynkup burom ïa kitei ki samla da ka jingdon lang u Adviser ka RBYF, u Bah A.G Sten, u Vice President ka RBYF, u Bah L.K Sawkmie bad kynthup ruh ki dkhot na ka Circle bad ki Unit. Ïa ka jingïalang la pyniaid da u General secretary, u Bah Bullet Marbaniang.
Kum ka jingai mynsiem ne pynshlur ïa ki samla pule bad ruh ka Kong Margaret Pathaw, ka RBYF ka la sam ruh ki syrnot sah jingkynmaw bad kynthup ruh ka song pisa kum ka khusnam ban burom halor ka jingjop jongki kaba wan rah nam bad burom ïa ka jylla.
Haba kren ha kane ka sngi, u President ba rangbah ka seng, u Bah Bipul Thang-khiew u la ong, kane ka jingpynkup burom ïa ki samla pule ka dei ka sienjam kaba khatar bad ka daw kaba ka seng ka pynkup burom ka long ka jingangnud ka seng ban pynshlur ïa ki khun samla ba kin dang bteng ka jingpule sha ki kyrdan ba shaneng ba kum ka District ka dang donkam shibun ki samla ban shakri na ka bynta ka bha ka miat bad ka roi ka par jong ka District.
U la ong ruh ba ka seng RBYF ka dei ka seng kaba la iarap bad pynmih bun ki ophisar ne ki riewkhraw na ka District bad u la pynpaw ruh kum u Samla Lamphrang Nongtri uba la poi ha ka kyrdan top -20 ha ka SSLC examination ka seng ka la kyrshan pisa bad iarap ruh ba un poi shaduh ka kyrdan Doctor kaba dei hi shi bynta ka jingpynshlur ka seng kaba la long ka burom ym tang ïa ka ing ka sem jong u bad ka long ka nam bad ka burom ïa ka shnong ka thaw bad ka District hi baroh kawei.
U la pynshai ruh balei ba ka seng RBYF ka ju pynlong kum kane ka jingpynkup burom ïa ki samla pule bad ka daw tynrai hi ka long ba ka seng ka kwah ba kyntiew ïa ka jingnang jingstad, namar ban wan ka jingkylla ha ka imlang ka sahlang ne ban rad dynkhong ïa ka jingduk bad ki jingsahdien ka dei tang lada ka District ka lah ban pynmih ïa kita ki khun samla kiba la biang ha ka kyrdan pule, u la pynpaw.
Namarkata, u Bah Bipul Thangkhiew u la kyntu ruh ïa ki khun samla ba ki dei ban trei shitom ha ka jingim bad khamtam ha ka pule ka puthi, namar ban wan ka jingkylla ha ka imlang ka sahlang la donkam ban ngin don kita ki samla kiba la biang pura ha ka kyrdan pule la ki dei ha ki kam sorkar ne ha ki kam nongïalam ha ka District bad ka jylla.