Press "Enter" to skip to content

Ki karkhana saiñ nar ki nongpynjot ba shyrkhei tam ïa ka mariang

Nongstoiñ, Nailar 24: Hadien katto katne sngi ba ka sorkar ka la pynpaw lyngba ki lad pathai khubor ba ka don ka jingangnud ban pynrben biang ïa ki khlaw ki btap, da kaba aiti ha kawei ka Komiti kaba la tip kum ka Ecological Task Force (ETF), kaba yn peit da ki heh sorkar kiba la shong thait ryngkat ka jingïatrei lang bad ka Ministry of Defence lada ka tnad ïada Ri, shisien peot ka dei ka jingthmu kaba sngew tynnad bad kaba ki paidbah ba bun ba lang ki la sngew dei.
Haba phai pat sha katei ka phang, u nongthoh khubor u la ïoh ban ïakren bad kiba bun ki riew ieit mariang kiba dei na West Khasi Hills, ha kaba ki la ong ba baroh ki jingthmu jong ka sorkar ki long kiba bha. Hynrei ka don pat ka jingbym lah ban shaniah namar kumba ka long mynta ki karkhana saiñ nar kiba la ai jingbit da ka sorkar ki kylla long pynban ki nongpynjot kiba shyrkhei tam ïa ki jingdon jingem ha ka mei mariang kum ki khlaw ki btap da kaba ki pyndonkam ïa u rnga haba ki saiñ nar.
Nalor kata kitei ki karkhana saiñ nar ki pyndon kam ruh da ki bun jait ki marpoh khyndew kata u dewïong bad u mawleiñ uba ki shu thied na ki briew kiba leit die ha kitei ki karkhana.
Ha West Khasi Hills haduh mynta ka karkhana saiñ nar kaba la paw khmat bha ka dei ka Shakambari Ferro Alloys Limited kaba don harud jong ka wah Rwiang. Ym lah ban len ba ka jingdon jong katei ka karkhana saiñ nar ha katei ka jaka, ka la ktah haduh katta ïa ki khlaw ki btap ha West Khasi Hills, namar ka jingdonkam rnga ha katei ka karkhana ka long da ki spah trok ha ka shi bnai. Nalorkata sa u dewïong bad Mawleiñ, hynrei haba leit ban pan jingshai na ki heh nongpynïaid jong katei ka karkhana, ym ju poi shano shano ruh namar ka jingwan tuklar jong ki trai shnong khamtam eh na u sordar jong katei ka shnong.
La ju lap ruh man ka sngi ba ki trok kit rnga na West Khasi Hills ki tuid sha Byrnihat ban leit buh rnga, namar ka jingdawa rnga ka jur haduh katta katta ha kitei ki karkhana. Hynrei ym ju kham ïoh sngew koit ba ki trok kit rnga kin shah kem ha ki bor ka aiñ.
Katto katne bnai mynshuwa la ïoh ban ïakren bad uwei u nongtrei ha ka tnad khlaw u ba trei ha East Khasi Hills bad haba pyrshang ban twad jingmut na u ha kaba ïadei bad ka jing ïohlad ban shalan rnga, u la ïathuh ba haba ki leit duty ynda ki la ïoh ban bat ïa ki trok kiba kit rnga kiba wan na ki thaiñ West Khasi Hills, kim ju nud ban bat slem, namar mar ïa bat tang katto katne por la wan poi ki briew ba shong kali rem dor kiba bud nadien bad ki la shu hukum beit ïa ki ba kin leit ïakynduh ïa ki bor ba halor bad tang katto katne por la phah pyllait noh ïa ki.
La ong ruh ba ka jingleit duty jong ka dei tang ban kohnguh ïa ka kamram ba dei ban leh hynrei kam don jingmut satia. Lada kan ïai long kumne haduh mynta, kumno ka sorkar kan pyrkhat ne hato ki tnad treikam kum kata ka Meghalaya Pollution Control Board (MPSCB) bad ka tnad ba dei peit ïa ki khlaw ki btap, ka leh aïu ne tang ba la don ka kyrteng ha ka sorkar ka la biang beit. Ka sorkar ka la dei ban shimkhia lym da kumta ka jingangnud bad ka jingthmu jong ka sorkar ban pynrben pat ïa ki khlaw ki btap kan ym poi shaei shaei ruh bad ka jingjot ka mariang kan nang kiew ar shah.