Press "Enter" to skip to content

Plie ka tnad Public Health Engineering ïa ka Swachh Survekshan Grameen ha Ri Bhoi District

Nongpoh, Nailar, 24: Kum kawei pat ka mat treikam kaba hakhmat eh ban wanrah ïa ka jingsngewthuh paidbah halor ka jingkordor jong ka jingleh khuid leh suba hapoh ki district bapher bapher jong ka Ri India hi baroh kawei, na ka liang ka sorkar pdeng ka la pynmih pat sa kawei ka prokram kaba la tip kum ka Swachh Survekshan Grameen 2019, kaba dei ruh ka bynta kaba kongsan jong ka Swachh Bharat Mission.
Ïa kane ka prokram kaba yn pyntreikam ha baroh ki district ka Ri India, mynta ka sngi ka tnat treikam jong ka Public Health Engineering, Nongpoh Division ka la plie paidbah ban sdang treikam noh ïa kane ka prokram ha Ri Bhoi District ïa kaba la wan ban plie da ka Kong Doreen Phawa, MCS, kaba dei ruh ka Additional Deputy Commissioner ha ka jingïadonlang ruh da u Bah D.D Umdor, Executive Engineer ka PHE lem bad kiwei kiwei ki ophisar jong kane ka tnat.
U Bah D.D Umdor, EE ka PHE bad kum u Member Secretary ka District Water & Sanitation Mission (DWSM), u la pynpaw, ba ka jingthmu lane ka mat treikam kaba kongsan jong kane ka Swachh Survekshan Grameen kaba ïa syriem thik bad ka Swachh Bharat Mission, kaba angnud ban wanrah ïa ka jingsngewthuh paidbah ha ka jinglehkhuid leh suba ha la ing la sem, ha ki shnong ki thaw bad kiwei kiwei, bad lyngba kane ka prokram yn lah ruh pat ban jied ïa kawei na ki district kaba lah ban kot sha ka thong jong kane ka prokram ban ioh khur ïa ka khusnam kaba kyrpang na ka sorkar pdeng.
U la ong ruh, ban pynlah ban urlong ïa kane ka jingangnud jong ka sorkar pdeng ha kaban pynlong ïa ka Ri India baroh kawei kaba lait na ki jingjaboh bad kaban long kaba khuid kaba suba, ka tnad treikam jong ka PHE ka la khot la wer ïa ki paidbah nongshong shnong jong kane ka district ba kin ai ïa ka jingïatreilang ban pynurlong ïa ka jingthmu jong ka Swachh Survekshan Grameen bad ruh khnang ba kane ka district kan ïoh ïa ka jingithuh kaba kyrpang na ka sorkar pdeng.