Press "Enter" to skip to content

Plie u Myntri PHE ïa ka lympung ïalehkai phutbol ha Kynshi Bangla

Mairang, Nailar 24: U Bah Samlin Malngiang Myntri ka tnad PHE ka Sorkar Jylla mynta ka sngi Saitjaiñ u la plie pyrda ïa ka lympung ïalehkai phutbol ba la tip kum ka 2nd Football Knock Out Tournament 2019 ba la pynïaid da ka Kynshi Bangla Social & Cultural Club ha madan ïalehkai jong ka Shnong Kynshi Bangla West Khasi Hills District.
U Bah Samlin Malngiang haba ai jingkren ha katei ka sngi u la ong baroh ki jait jingïalehkai kum ka jingïalehkai phutbol dei ban pynlong ha man ki jaka khnang ba kan long ka jingïarap ïa ki samla ba kin long kiba khlaiñ, kiba khiah krat bad ba kin lait na ki jingmlien ba sniew.
Ha kane ka sngi plie pyrda ka jingïakhun ka la long hapdeng ka Assam Regiment Football Club pyrshah ïa ka Sawmer Football Club bad ha kane ka jingïakhun ka Assam Regiment FC ka la khur ïa ka jingjop da kaba pynliem noh ïa ka kynhun ïalehkai jong ka Sawmer FC da 3-2 kol.
Ha kane ka sngi la ïadon lang ruh u bah HB Nongsiej MLA ka Mawthadraishan Constituency, bah A Nongbri SDO (C) Mairang Civil Sub-Division, bah M Diengdoh EAC Mairang Civil Sub-Division, bah L Dhar Executive Engineer, PHE Mairang Civil Sub-Division bad u bah A Syiemlieh Sordar shnong ka Kynshi Bangla uba la pynïaid ruh ïa ka jingïalang.