Press "Enter" to skip to content

Pynthikna u Dr Mukul bym don ki MLA ka Congress ban pynïasoh sha ka BJP

Shillong, Nailar 24: U Nongïalam ka Liang Pyrshah Dr Mukul Sangma, ula pynthikna ba ym don satia ki MLA ka Congress ki ban pynïasoh ïalade sha ka seng Bharatiya Janata Party (BJP).
“Ym don satia mano mano ruh ban pynïasoh sha ka BJP….Nga tip bha ïa ki (MLA ka Congress) bad ïa kane nga pynthikna ha phi” ong u Dr Mukul uba dei ruh u Nongïalam ka Congress Legislature Party (CLP) haba ïakren bad ki nongthoh khubor.
HAba pynkut ïa baroh ki jingmutdur, une u Myntri Rangbah barim ka Jylla ula ong “Haba ïadei hi bad ki Dkhot ka CLP, ngi la iadonlang ban pyni ïa ka jinglong ki nongïalam ba don jingkitkhlieh bad ban iatreilang kumka kynhun kum ka CLP nalor ban trei ruh kum ka Liang Pyrshah kaba don jingkitkhlieh bad ba kitkhia ïa ka kam”.
U Dr Mukul Sangma dang shen ula kyntait ïa ka jingmih khubor ba kynnoh ba u don jingthmu ban pynïasoh ïalade sha ka BJP.
Une u Nongïalam ka Congress ula pyntip ba ula kyntu ïa ka Cyber Cell jong ka Tnad Meghalaya Police ban pynthikna ïa ka tyllong jong kane ka khubor lamler bad ban leh eiei kat kum ki kyndon jong ka Aiñ.
“Namar kane ka dei kaba la leh da ka jingthmu ban pynthohbria lyngba ka jingai khubor ba lamler ban pynsngewthuh bakla, pynkulmar jingmut bad ban pynbit thit ïa ka kyrdan ba nga bat…ka dei kaba hap ban pynrem” ula ong.
Haba kylli halor ka sienjam bala shim da ki Pulit, u Dr Mukul ula ong “Ai baki Pulit kin leh ïa kaei kaba ki dei ban leh. La khmih lynti ïa ki ba kin leh eiei kat kum ka kyndon aiñ. Mynta lada kila ïaid kat kum ka aiñ, kin sa hap ai jubab namar nga hi nga shu kyntu ba kin leh eiei kat kum ki kyndon Aiñ”.
Halor ka jingkren jong ka MLA ka East Shillong ba dang shen kong Ampareen Lyngdoh, une u Nongïalam ka CLP ula ong ba ka Congress ka don ïa ki buit treikam kumno ban pynbeit ïa kine ki kam hapoh ka Party.
“Ngi don ïa ki buit treikam . Ngi la lah ban pynbeit ïa kum kine ki kam ha ki snem bala leit noh bad ngin dang ïai bteng ban leh kumjuh mynta” ula ong.
Haba ban jur ba ka CLP hapoh ka jingïalam ka jong u ka dang iatylli mlon, u Dr Mukul ula ong ba um lah satia ban sngewthuh ba kumno ki briew ki mutdur hynrei baroh ki dkhot jong ka CLP ki dang iatylli kawei.
U Dr Mukul u pyntip ba ka Kong Ampareen ka dang ïashimbynta ka ka jingïalang jong ka CLP kaba ïakren ïa shibun ki kam dang shen, une u Nongïalam ka Congress ula ong ba baroh ki MLA ka Congress ki kmen ban shim ïa ka bynta kum ki Dkhot ka Liang Pyrshah bad ban trei borbah ruh kum ki Liang Pyrshah.