Press "Enter" to skip to content

35 tylli ki shnong hap kynriah namar ka HEP jong ka Assam ha wah Khri

Ka dei ka National Project, ong u CM

Shillong: Kumba 35 tylli ki shnong kiba don ha West Khasi Hills kin hap ban kynriah ne phetshnong namar ka jingden ka Assam ha wah Khri ban pynmih bording elektrik.
Ïa kane la ïathuh da u Bah Kimfa Marbañiang, MLA ka Congress hapoh ïingdorbar ha ka sngi baar. Haba wanrah ïa ka jingkylli halor ka Kulsi Dam Project kaba hap ha ka khappud Meghalaya bad Assam, u Bah Kimfa, u la ïathuh ba katkum ka RTI ba u la ïoh la ong ba kumba 35 tylli ki Shnong kin shah tam ynda dep kane ka Dam lada kim phet shnong. Ka jaka ban treikam kane ka Dam kan long kumba 15.05 Sq Km bad na kane kumba 5.75 Sq Km kan hap ha Meghalaya.
U MLA Rambrai u la kylli na ka sorkar la ka la ai NOC ne em halor kane ka Project bad wad jingtip ruh na ka sorkar kiei ki lad ki lynti ba ka la shim ba ki jaka kiba hap hapoh u pud u sam ka Meghalaya kin nym shah ktah.
Halor kine ki jingkylli bad ka jingwad jingtip u MLA Rambrai, u Myntri Rangbah u Conrad Sangma, uba pynjubab na ka bynta u Myntri ka tnad bording, u James Sangma, u bym shym lah ban wan namar ka jingshitom, u la ong ïathuh ba ka sorkar jylla kam shym la ai NOC sha ka Brahmaputra Board. Hynrei ka la don ka jingïalang ha ka 21 tarik u bnai ïaïong mynta ka snem ban ïakren halor kane ka kam. Tangba u la ong ba ka sorkar jylla kam pat lah ban ong eiei, namar ba ka sorkar Assam kam pat dep pynkhreh ïa ka Detail Project Report (DPR).
Na ka liang u Nongïalam ka Liang Pyrshah, u Dr. Mukul Sangma, u la kylli la kane ka jaka ba shna ïa ka Dam ka hap ne em ha ki jaka ba don hapdeng ka jingïakajia hapdeng ka Meghalaya bad ka Assam, ïa kaba u Conrad u la ong ba um lah ban ong ei ei halor kane, katba ym pat dep ka DPR. Kane ka jubab u Myntri Rangbah ka la pyndom ïa u Dr. Mukul, ha kaba u la ong ba kumno ha kata ka jingïalang ym lah ban tip la kane ka jaka ba shna ïa ka dam ym lah ban tip ka hap ne em ha ki jaka ba don jingïakajia hapdeng ki ar tylli ki jylla. Sa shisien pat u Conrad u la ong ba un ap beit ïa ka DPR bad hadien kata na ka liang ka sorkar jylla kan sa leh ïa kaba donkam.