Press "Enter" to skip to content

Ba tuid um jaboh sha Elephant Falls, sha ktem shipai hiar jurip u Magistrate bad ki ophisar

Shillong, Nailur 10 : Ka kynhun ki ophisar na ki tnad bapher bapher jong ka sorkar jylla hapoh ka jingïalam jong u Magistrate, Bah PT Passah hynne ka sngi Ba-ar ki la hiar jurip sha ktem jong ki shipai Indian Air Force, Upper Shillong ban wad la ka tynrai jong katei ka jaboh kaba tuid sha ka kshaid Elephant Falls ha kine ki khyndiat sngi kadei nangtei ne na kawei pat ka jaka.
Ha katei ka sngi, ki ophisar kiba leit ki kynthup naduh na ka tnad Tourism, Meghalaya State Pollution Control Board, PWD, Forest, Water Resources, na ka tnad Pulit kumjuh na ka San Shnong Youth Welfare Organisation, ka kynhun kaba pynïaid ïa katei ka jaka jngohkai pyrthei.
Na ka liang u Magistrate, Bah PT Passah ryngkat u Bah James Lamurong, Engineer na ka Meghalaya State Pollution Control Board, Bah ML Lawai EE Water Resources, Bah S Nongkynrih Tourism Officer, M Lyngdoh AEE PWD kumjuh u Bah EB Kyndiah DySP Crime bad kiwei kiwei ryngkat ki heh shipai ki la leit ban jurip sawdong katei ka len shipai.
Ki jaka kiba ka kynhun ka leit ban jurip ki kynthup naduh ki jaka ba pyntuid ïa ki um jakhlia ba mih na ki ïingsah, ka skul, ki jaka ai jingsumar, ki jaka treikam, ki jaka bam, ki jaka ba tei ïa ki septic tank bad wat ïa ki paiñkhana jong ki shipai bad jong ki nongbylla kiba don ha katei ka jaka. Haman ki jaka ba ka kynhun ka leit ban jurip ka shim ruh khyndiat ka um ban test kynthup na ki wah kiba ïaid lyngba jong katei ka len shipai bad tuid pat sha Elephant Falls.
Ha ka jingjurip kaba la neh bun kynta bha, ka kynhun ka la leit ruh ban peit ïa wahrit kaba tuid lyngba ka jaka jong ka Veterinary bad poi pat sha jaka jong ki shipai. Hadien ba la dep ka jingjurip ïa ki jaka jong ki shipai ka kynhun ka la leit run ban jurip lang ïa ki jaka jong ka tnad Veterinary kaba don ha syndah hangtei hi.
Lah ban kdew hangne, ba ïa katei ka jingjurip la phah da ka Deputy Commissioner, East Khasi Hills, Kong Matsiewdor War Nongbri ban leit jurip ïa ki jaka jong ki shipai bad ruh jong ka Veterinary halor ki jingjia ha kine ki khyndiat sngi ba ka kshaid Elephant Falls ka la stem hi kmur da ki jaboh jabaiñ kiba wan tuid na ki bynta ba shaneng jong ka wah.
Ha kitei ki sngi ba katei ka kshaid ka kylla rong, na ka liang ka Pollution Control Board ka la dep ruh shim ïa ka um na katei ka kshaid na ka bynta ban test.
Katkum ka jingïathuh jong u General Secretary ka SSYWO, Bah Leonel Nongkhlaw, ki don ar tylli ki tyllong um kiba wan na Lum Shyllong kiba tuid sha katei ka kshaid, kata kawei kaba ïaid lyngba ka ktem shipai bad kawei pat lyngba ka jaka jong ka Veterinary.
Haba pyrshang ban wad jingtip na ka Deputy Commissioner halor ka jinglap jong ka kynhun na katei ka jingjurip, ka jubab kaba ka ai ka long ba ki dang lum mynta ïa ki jingtip baroh.
La ïoh jingtip ruh ba ka kaiphod jong katei ka jingjurip kan kham shimpor katto katne sngi namar ba hap ban test shwa ïa kitei ki um baroh kiba ki shim na baroh ki jaka ba ki wan jurip ha katei ka sngi bad ruh ha ki sngi ba la dep.