Press "Enter" to skip to content

CM: Ym lah pyntreikam ïa ka NRC ha Meghalaya

La bat 223 ki mynder naduh 31 Nailar

Shillong: Wat lada la mih bun ki jingdawa ban pyntreikam noh ïa ka National Register of Citizen (NRC) ha Meghalaya kumba la pyntreikam ha Assam, hynrei u Myntri Rangbah ka jylla, u Conrad Sangma, u la ong ba jylla kam lah ban pyntreikam satia ïa kane.
Haba jubab ïa ka jingïatai halor ka jingma kiba ap ïa ka jylla namar ka jingpyntreikam ï aka NRC ha Assam, u Myntri Rangbah, u la ong ba ka jinglong nongshongshnong ha ka ri kadei ka kam jong ka sorkar pdeng bad ka sorkar jylla kam ïadon bynta eiei halor kane. “Ka sorkar jylla kam lah ban pyntreikam ïa ka NRC, namar kane kadei ka kam jong ka sorkar pdeng”, u la ong.
Hynrei u la ïathuh hapoh ïingdorbar ba naduh ba la pynmih ïa ka thup kaba khatduh jong ka NRC ha Assam ha ka 31 tarik u bnai baladep, na ka liang ka sorkar ka la bthah ïa ka tnad Pulit ban phikir bha ha man la ki khyrdop, khnang ban khanglad ïa ki briew ki bym don ha ka NRC ha Assam kin nym ïong rung sha kane ka jylla. “Ha ka jingshisha naduh ba la pyntreikam ïaka NRC ha Assam naduh u snem baladep, la thung ïa u DIG (CID) ban khlieh ïa ka jingpeitngor ha ka jylla baroh kawei”, la ong u Conrad.
Nalorkata haman la ki khyrdop la buh ïa ki Sub Inspector of Police bad ki Langrut ban peit bniah ïa ka jingwan rung ki briew ki bym biang ki kot ki sla.
U la ong ruh ba ka long kaba bakla ban ong ba ka sorkar jylla kam pat pyntreikam ïa ka Meghalaya Residents Safety and Security Act, namar ba la sdang ban thung ïa ki District Task Force Committee ha man la ki District. Hynrei ka sorkar ka ïohi ba dang donkam ban pynkhlaiñ shuh shuh ïa kane ka aiñ bad dei namar kata ka daw ka don ka jingthmu ban wanrah da ki amendment ne ki jingpynkylla ha ka aiñ.
Ha kajuh ka por u Conrad u la ïathuh ba naduh ba la pyntreikam ïa ka NRC ha Assam haduh ka 4 tarik mynta u bnau, 223 ngut ki mynder la ïoh batha ki khyrdop talasi jong ka sorkar. Na kine 114 ngut la ïoh bat an Byrnihat, 66 ngut na Danaidubi, 50 ngut na Ratacherra bad 3 ngut na Khliehriat. “ïa kine ngi la phah pynphai biang namar ba kim biang ki kot ki sla”, la ong u Conrad.
Ha shuwa ki dkhot ka Liang Pyrshah haba ïashim bynta ha ka jingïatai ba la wanrah da u bah Mayralborn Syiem, MLA Nongpoh, ki la pynpaw ka jingsngewkhia kaba jur ïoh ba ki briew na Assam ki bym shym ïoh rung ha ka NRC kin wan phet beit sha ka Meghalaya, namar ba kadei ka jylla kaba marjan bad suk ban rung. Nalor u Bah Mayralborn, kiba la ïashim bynta ban ïakren ki long u Dr. Mukul Sangma, MLA ka Songsak, Kong Ampareen Lyngdoh, MLA ka East Shillong, Bah George B. Lyngdoh, MLA ka Umroi, Bah Process T. Sawkmie, MLA Mawlai, U Bha Adelbert Nongrum, MLA ka North Shillong, u Dr. Azad Aman, MLA ka Phulbari, u Saleng Sangma, MLA ka Gambegre bad u S. Monimin, uba la pyrshah ban pyntreikam ïa ka NRC ha jylla.