Press "Enter" to skip to content

Dei ban ailad noh ka UDP ha u samla ba la ih ka rta ban ïalam ïa ka party

————–W.R Sumer——————-

Shillong, Nailur, 10: Ki MDC jong ka Seng Congress kiba shong ha ka Liang Pyrshah jong ka Khasi Hills Autonomous District Council (KHADC) mynta ka sngi baar ki la kynnoh ba ka Executive Committee hapoh ka jingïalam jong u Bah Teiñwell Dkhar kum u Chief Executive Member (CEM) ka shu ïoh thiah lyngngai bad kam don wat tang khyndiat ruh ka jingkitkhlieh ban buddien ha kaba ïadei bad ka Proposed Amendment jong ka Sixth Schedule jong ka riti synshar ka ri India.“U Nongialam ka Lïang Pyrshah ka Seng Congress u Bah Lamphrang Blah ha ka jingïakren bad ki lad pathai khubor u la ong, “haduh mynta ngim tip haduh katno ka Executive Committee ka la buddien halor kane ka jingpynbeit thymmai ïa ki khyrnit jong ka Sixth Schedule namarba ngi sngewkhia bad ngi sheptieng ruh ïoh ba ki hok jong ngi ki shah pynkylla.”“U Bah Ronnie V. Lyngdoh, haba bynrap halor kane u la ong, “ngi sngewkhia haduh katta katta ba kane ka EC ba mynta ka ïoh thiah lyngngai bad kam don hi ruh wat ïa ka jingkitkhlieh.”“U la ong ka jingsngewkhia jong ki MDC ka seng Congress ka dei halor ka nongrim ïoh ba ka jingpynbeit thymmai ïa ki Khyrnit ka Sixth Schedule kan pynjynsur pynban ïa ki kyndon aiñ. “Lada ka Sorkar kam lah ban pynrung lut ïa baroh ki MDC ha ka Komiti hynrei ka ladei ban jied tang uwei uwei u MDC ban mihkhmat na kawei ka Party. Lada ki dkhot ka Meghalaya Indigenous Tribal Constitutional Rights Movement ki ïa don bynta ha ka Komiti, balei pat ïa ngi ym lah ban kynthup lang ha ka komiti?” la ong une u MDC ka Congress na Mylliem Constituency.“Haba kylli u la ong, “ngi sheptieng ïa ka Citizenship Amendment Bill kaba plie ïa ka jingkhangbah jong ka thaiñ Shatei Lammihngi ïa ki 18 million ngut ki nongshong shnong Hindu jong ka Ri Bangladesh ban wan shong shnong ha ri India. Kumba ka paw, ka Sorkar BJP ka kwah ban pyntreikam da ka CAB. Peit ka Article 370 ka Sorkar India ka la weng. Ngi sheptieng ïoh ba ka Jylla Meghalaya ka kylla kum ka Tripura.”“Ha kaba ïadei bad kane u Bah Bajop Pyngrope u la ong, “kumba ka long mynta ngi ïohi ba ka Sorkar Jylla ka la thung dkhot ha ka Komiti tang ïa ki CEM jong ki lai tylli ki Autonomous District Council. Hynrei kum ki nongmihkhmat ba la pynkupbor da ka iktiar jong u paidbah ngi sngew ba ngi donhok ban ïadonlang hapoh ka Komiti khnang ba ngin ïoh ai lang ïa ki jingmut.”““Kumba ngi ïohi, dei pynban ki sengbhalang kiba shimkhia ban buddien na ka Sorkar ha kaba ïadei bad kane ka kam bad ngim shym la ïohi satia ba ka Executive Committee jong ka KHADC kan khih kan ksar,” u la bynrap.“Dang ha kine ki khyndiat bnai bad dang shen ruh ka kynhun jong ka Synjuk ki Nongsynshar Shnong ka Bri u Hynñiewtrep bad ki Sengbhalang ka Jylla hapoh ka lama jong ka Meghalaya Indigenous Tribal Constitutional Rights Movement (MITCRM) ki la ïakynduh ïa u Myntri Rangbah ka Jylla, u Conrad K. Sangma ban pan jingpynshai halor ka jingtyrwa ban pynbeit thymmai ïa ki khyrnit jong ka Sixth Schedule.“Ha kane ka sngi, ka Sorkar Jylla bad ka MITCRM ki la mynjur ban thaw da ka Sub-Committee ka ban bishar bad ka ban buddien halor kane.“Ka Congress ha kajuh ka por ka la kynthoh ruh ïa ka jingbym buddien jong ka Executive Committee ka KHADC halor ka Draft National Education Policy ba la wanrah da ka Sorkar India.““Kane ka EC ha ka jaka ban buddien bad ban ai jingmut, i kumba ka ïohthiah man lyngngai. Ha ka jingshisha ka la dei ban buddien namarba ka Primary Education ka dei ka Sobjek jong ka District Council,” la ong u Bah Ronnie V. Lyngdoh bad u la ong, “ka EC ha ka jingshisha ka ladei ban buddien na ka Sorkar India hynrei haduh mynta ngim ïohi eiei ruh em.”“Katkum ka jingsngew jong u, ula ong, “ka sorkar India ka la dei ruh ban pynrung ïa ki Minority School ha ki kyndon jong ka National Education Policy bad kam dei hi ruh ban pynlong Compulsory ïa ka Sobjek Hindi naduh Class Nursery haduh Higher Secondary namar kane kan ktah ïa ka pule ka puthi jong ki khynnah skul riewlum ki bym nang satia ïa ka ktien Hindi.”“Ka Kong Grace Mary Kharpuri, ka MDC jong ka Congress na Nongshken Constituency ka la bynrap, “ngi sngew ba ka Sorkar ka dei ban pynlong ka Ktien Khasi kum ka Second Language bad ïa ka Ktien Hindi kum ka Optional Sobjek ne ka 3rd Language:”