Press "Enter" to skip to content

Hiar ïalap ka tnad ka koit ka khiah sha Iooksi halor jingbthat jubor ïa ka jingim

Jowai, Nailur, 10: Ka District Mental Health Programme Jowai Cilvil Hospital Ialong ka la hiar ïalap sha ka shnong Iooksi, West Jaiñtia Hills halor kum kumno ban ïada ïa ka jingbthat jubor iaka jingim.
Kane ka jinghiar ialap ka tnad ka koit ka khiah sha katei ka shnong kalong ban pynshai bad pynsngewthuh paidbah naduh khynnah skul haduh kiba la rangbah halor kumno ban ïada bad kiar ban bthat ïala ka jong ka jingim.
Kane ka jinghiar ïalap ka tnad ka khoit ka khiah naka District Mental Health Programme Jowai Cilvil Hospital Ialong kadei shimbynta ban rakhe ‘World Suicide Prevention Day’ bad kaba la pynlong shitaiew lynter naduh 9-14 tarik une u bnai.
Ha kane ka jingai jinghikai ka District Mental Health Programme (DMHP) Jowai Cilvil Hospital Ialong la wan ïashimbynta da ki 10 tylli ki jong ka thain. Ïa kane ka prorkam la pynlong ha ïing dorbar ka Shnong Iooksi haka sngi ba Ar.
U Kongsan ha kane ka prorkam u dei u ma Romit Syngkon Sub-Inspector of Police In-charge, Garampani Out Post bad u Ma C Tangliang Waheh Shnong Iooksi kum u symbud kongsan.
Ïa ka jingïalang la pynïaid da ka Dr. E Dann Programme Officer, DMHP uba la ïathuh bniah ïa ka jingthmu jong kane ka prokram ban pynshai paidbah halor ka jingthmu jong kane ka prorkam.
U ma Romit Syngkon haba kren ula ong na ka liang ka tnad pulit na ka por sha ka por ki ïoh ïa ki case ba ki briew ki bthat jubor ïa ka jingim. Ula ong haka jingtohkit bunsien la lap ba kito kiba leh ïa kum kine ki kam kidei kiba mad ïa ki jingeh haka jingim ka jong ki. Kumta ula kyntu ïa baroh ki khynnah skul ban long kiba skhem ka jingmut jingpyrkhat bad ban ym ailad ïa kum kine ki jingjia kin wan pynthud iaka jingim jong ki bad ba haba ki shem kino kino ki jingeh ki dei ban ïathuh ïa kaei kaba jia haka jingim haki kmie ki kpa, kiba ha iing bad kino kino kiba ki sngewjan.
“Da kaba phi ïathuh ïa kino kino ki jinglap jingshem bad ki jingeh jong phi, ka jingmut jingpyrkhat jong phi kan sting bad ba phi lait ban shim kino kino ki sienjam kiba ki sniew lane kiba poi shaduh u pud ba shim ïala ka jong ka jingim.” la ong u Ma Syngkon.
Ka Dr. AM Paswet Psychiatrist, District Nodal Officer DMHP bad ka Kong Shelomi Syngkon, Clinical Psychologist DMHP lyngba ka pyrda (power point presentation) kila ai ka jingbatai pynshai ïa ki khynnah skul bad ki nongshong shnong ka thain.
Kine ki riewshemphang kila ïathuh ba ki don bun ki daw ba ki briew ki shim ïala ka jong ka jingim bad kine ki kynthup ïa ka jingkyrni haki jait jingdih pynbuaid, ka jingpang sngewsih (Depression) ka jingshah rem ha kano kano ka jingthmu, ka jingduh noh ïa kiba ïeid bathoiñ nalor kiwei kiwei.
Ka Dr AM Paswet ka la ban jur ïa ki khynnah ba kin ïeid ialade bad ban ïarap ruh ïa ki paralok kiba ki suba bad ipher ka jinglong jingman ki paralok bad ban ïakren ïathuh khana ban sngewthuh ïa ka jingeh ki paralok. Lada lap ïa ki paralok kiba shitom ka bor pyrkhat ym dei ban ibein ne niewbein hynrei ban ïarap da ka mynsiem jong ka jingieit.
Ka Kong Shelomi Syngkon ka la ong ka jingshitom ha ka bor pyrkhat ka lah ban ktah hano kano ka rta la kidei ki kynthei ne shynrang. Ka la pynshai ruh halor ki saw tylli ki jait jingshitom ha ka bor pyrkhat ba kynthup ïa ka Eustress, Distress, Hyperstress bad ka Hypostress. Ka tnad ka koit ka khiah ka la pynbna ba kino kino kiba don kam ïasyllok halor ka jingshitom haka bor pyrkhat ba kin wan haka jaka syllok kaba jan tam ha Jowai Civil Hospital haka kamra kaba 309.