Press "Enter" to skip to content

Jop ka Ngunraw United ïa ka Mawjai SC ha ka jingïalehkai plie pyrda ïa ka 1st TFT 2019

Mawkyrwat, Nailur 10 : Ka kynhun ïalehkai jong ka Ngunraw United mynta ka sngi la long ka nongjop da kaba ka la ïoh ban thep da 2 la 1 kol pyrshah ïa ka Mawjai Sports Club ha ka jingïalehkai ban plie pyrda ïa ka 1st Turshaphrang Football Tournament 2019 ha Madan Umdohlun, South West Khasi Hills District, Mawkyrwat.
Ha ka jingïalehkai ba ka long mynta ka sngi ka long shisha ka jingïalehkai ba itynnad ha kaba baroh ar liang mamla ki la ïa pyni ïa ki sap ki phong ba ki ki don, hynrei hapdeng ka jingïaleh ka don ka kynhun kaba jop bad ka kynhun kaba rem.
Haba phai ha ka jingïalehkai, na ka liang ka Mawjai Sports Club ka la ïoh ban thep ïa ka kol kaba nyngkong eh ha ka jingïalehkai jong ka kyllastep, hynrei kat haduh ba kut jong ka jingïaleh ka Ngunraw United ka la ïoh ïa ka nam jingjop da kaba la la tam noh da 2 la 1 kol.Ïa kane ka lympung ïalehkai phutbol jong ka 1st Tur shaphrang Football Tournament 2019 ba la pynïaid da ka Hynñiewtrep Youths’ Council (HYC) Umdohlun Circle la ïoh ban plie pyrda da kaba khap ruh ïa u ribbon da u bah Carness Sohshang, MDC ka Mawkyrwat Constituency ha ryngkat ka jingïadonlang u Rhembor Saibon, Vice President ka HYC Central Body kum u symbud kongsan, u bah Markos Myrthong uba long ruh uwei na ki Nongïalam ka HYC Central Body, ki riew rangbah, ki khun samla bad kumjuh ki hep kiba rit.
Ïa ka jingïalang ba lyngkot jong ka jingplie pyrda ïa katei ka lympung la pynïaid da u Moonkingstar L. Paliar, President ka HYC Umdohlun Circle.