Press "Enter" to skip to content

Ka laisen ñiah kali bad ka DTO ha Meghalaya

Ha ki 15 bad 20 snem mynshwa ban ioh laisen ñiah kali ka long kaba jynjar haduh katta katta namar ki ophisar kiba dei peit ia ka District Transport Office (DTO) ki long kiba pyrkhing bad kin ym ailad satia da lei lei ruh ban ai ia ka laisen lada kito ki nongwan pan kim pat lah bha ia ki kyndon ñiah kali.
Nalorkata, wat hadien ba kito kiba wan pan laisen ki la nang ban ñiah ia ka kali hynrei lada kim pat tip pat ia ki jingkdew (signal) bapher bapher kin hap shwa ban lah lyndet bad hadien ba la pyntikna ba ki la lah shisha, kin sa ioh ia ka laisen, kata ruh khlem da donkam BAISHA.
Hynrei ka long kaba sngewsih ba ha kane ka pateng ba mynta, don ruh kiba ioh laisen kiba tang ka kali ruh kim pat nang ñiah bha. Hato balei kine baroh ki jia?. Lehse dei namar la suk palat ban ioh ia ka laisen tang namar ba biang ka BAISHA (kaba ki ju ong hynrei kaba palat pat wat ia ka bai bam shibnai) kaba ki ju pynkham ha kito ki ‘dalal’ kiba ju don ha ki phyllaw jong ki DTO.
Dang mynta u snem ka ophis u DTO ha Shillong ka la shah kynthoh tyngeh ha ka kynhun ki nongniah kali kamai halor ka jingtreikam bym hok jong ka haba iadei bad ka jingshakri iaki paidbah kiba pyndonkam ia ki kali. Katei ka jingshah kynnoh jong katei ka tnad sorkar kadei lyngba ka jinglap lyngba ka RTI ba la sei pyrthei da uwei u rangbah na Laimer kaba la kdew ba ka rukom treikam jong katei ka DTO ka la long shaba palat pud.
Katkum ka jingiathuh jong u, ha ki saw tylli ki jingialang jong ka RTA Board kaba long ha u Naiwieng, 2010 la shim ia ka rai ban a ka bynta ki taksi kamai ha ki nongkyndong la buh ba kidei ban long naduh ki model 2005 shaneng ne kiba thymmai katba na ka bynta ki taksi ban niah da ki kynthei pat ki dei beit ban dei da kiba thymmai.
Hynrei katkum ka RTI, la lap pynban ba ka DTO ka thok pyllein pyllein namar ki lap ba na ka thup jong kitei ki kali ban kamai ha ki nongkyndong ki don kiba dei naduh u snem 2004 watla ha ka jingialang jong ka Board ki la rai ban shah tang naduh u snem 2005 shaneng.
Ka jingbym teh pyrkhing ha ka rukom ai laisen kadei ruh ka dawbah ba ka tnad pulit ka kynduh jingeh bha bad kane kadei ruh ka dawbah kaba pynlong ia ka jingdheng kali ha kiba bun ki jaka namar bun kim pat tip satia wat tang ia ki kyndon ba hap ban burom ne ailad ia ki nongiaid lynti lyngba kitei ki Zebra Crossing. Bad ia kane lah ban sakhi bha ha ki bynta jong ka IGP bad Additional Secretariat ba ki kali baroh kim ju ailad satia ia ki paidbah ban jam na shilliang sha shilliang watla u don u Zebra Crossing uba heh bha.
Hato haduh katno kein ki pulit pyniaid kali kin don por ban hikai naduh A-Z ia ki nongniah kali ba kin tip ia ki kyndon niah kali baroh. Katei hi ka pawshai ba na ki DTO ki shu ai pathai ia ki licence kaba poi haduh u pud ba ki nongniah kali kim tip shuh wat ia kaei ka bym dei ban leh bad kaei kaba kidei ban leh haba ki don ha kali.
Lah ban ong ruh ba dei na ka dawe ka jingai laisen pathar ba ki pulit ka nongbah dang ha ki snem ba la lah ki la buddien ia ka bamsa ha ka ophis District Transport Office bad pynpaw pyrthei syndon ia ka jigdonkti lang ki nongtrei jong ka bad kito ki dalal ban pynioh licence, permit bad kiwei kiwei.
Ki pulit ym tang ba ki lap hynrei ki ioh ruh ban kem syndon ia uwei u Enforcement uba la donkti ha kaba dawa pisa na ki briew kiba donkam ka jingiarap na u, ki pulit ki la sdang ban lap dien ba ka don ka jingbam sap kaba jur bha na ki nongtrei jongkatei ka ophis ia kaba la suba ba ka don ka jingiasngewthuh jingmut naduh ki nongtrei kiba rit haduh ki nongtrei kiba halor duh.
Katei ka rukom treikam ka wanrah ka jingduh jingshaniah namar ka jingbakla na DTO ka pyndik bad pynbunkam bad pynsniew mynsiem wat ia ki pulit pyniaid kali kiba don ha surok baroh 24 kynta. Ka la dei ruh ka por ba ki heh pulit ka Jylla kin treilang bad ka Transport Department khnang ban teh lakam ia ka rukom ai laisen khnang ba kito kiba pan kin hap ban da pynbiang tikna thik pa thik ia ki jingdonkam baroh shwa ba kin ioh. Namar la ju iohi ruh na ka por sha ka por bad lah ban ong ba ka jia ruh jan man ka sngi ki pulit ki ju ioh dain kuna ia ki kali. Lada dei ba ki tip ain lehse katei kan ym jia.
Kam don jingmyntoi ban ïoh ïa ka spah bym hok kum kum ka Baisha nalor ka tulop. Ngi dei ban kynmaw ba ka don ka jingong,” ba uta u briew uba tei ïa ka ïing da ka spah bym hok ne uba shim noh na ka bhah ka bynta kiwei kiba duk kiba kynjar watla u pynïeng ki paki dulan, hynrei ka long kumba u lum thup bad kynton ïala u mot jingtep la jong.