Press "Enter" to skip to content

Mad jingeh ki paidbah ka thaiñ Balat Border ha kaba ïadei bad ka bording

Naduh ba ïasnoh kti lang ka MeECL bad ka company FEDCO”

Mawkyrwat, Nailur 10: Ki paidbah jong ka thaiñ Balat Border ki la pynpaw ba ki jingshem jingeh ha kaba ïadei bad ka bording naduh ba la ïasnohktilang ka Meghalaya Energy Corporation Limited (MeECL) bad ka company Feedback Energy Distribution Co. Ltd. (FEDCO).
Ha ka kyrwoh ba la phah da u General Secretary ka Hynñiewtrep National Youth Front, Border Area Circle, South West Khasi Hills District la ong ba ki paidbah ba bun ki la pynpaw ka jingdiaw bad ki ong ruh ba mynta ki ju ïoh bording tang 5 kynta ha ka shisngi kata naduh 5 janmiet haduh 9:15 janmiet.
Shuh shuh la ïathuh ruh ba ha ka jingïakren bad uwei na ki nongtrei jong ka FEDCO u Montu Bormon ula ong ba ka jingbymbiang ka bording ha kane ka thaiñ kadei namar ka jingbym shim khia jong ka MeECL namar, “ïa ngi ruh dang shah pynïaid (control) ha kine ki nongtrei ka MeECL, ngi lei ngi biang beit ka kam jong ngi”, ong u Bormon. Ka seng ka pynrem ruh ïa kum kine ki nongtrei la ka dei ka FEDCO ne MeECL namar ki paidbah jong kane ka thaiñ kim pat siew duna ïa ka bai thang bording hynrei kumno pat ka bording ha kane ka thaiñ ka dang duna palat bun shah ban ïa kaei kaba ki ju siew.
Ka seng ka dawa ruh ban weng mardor ïa kum kine ki nongtrei ki bym lah ban shakri ha kane ka thaiñ. Kane ka long katkum ka kyrwoh khubor na u samla Innocent Jyrwa, General Secretary ka Hynñiewtrep National Youth Front (HNYF), Border Area Circle South West Khasi Hills District.