Press "Enter" to skip to content

Pynlong ‘Skill Training’ ba 15 sngi ka Meghalaya Building &OCWWB

Shillong, Nailur : Ka Meghalaya Building and Other Construction Workers’ Welfare Board jong ka Labour Department ka Sorkar Meghalaya ha ryngkat ka jingïatreilang bad ka Directorate of Employment & Craftsmen Training (DECT), ka Sorkar Meghalaya bad ka Construction Industry Development Council (CIDC), kala pynlong ïa ka ‘Skill Training’ ba 15 sngi kynthih na ka bynta ka Kynhun ba Nyngkong (1st Batch) (Masonry) jong ki dkhot ka MBOCWWB ïa kaba la pynlong hapoh ITI Rynjah.
Kane ka jingai jinghikai kala kut noh ha ka 9 tarik Nailur 2019, lyngba ka jingsam ïa ki syrnot (certificates) sha ki nong ïashim bynta baroh da Labour Commissioner & Secretary jong ka MBOCWWB, U Bah B. Mawlong, MCS.
Ha kaba ai jingkren ha kane ka prokram na ka liang jong U Bah Mawlong ula ai khublei ïa ka CIDC kaba la shimkhia ban pynlong ïa kum kane ka prokram jingai jinghikai. U la ong ruh ba kiba kum kine ki jait jinghikai kin ïarap ha kaba pyntbit shuh shuh ïa ki nongtrei bylla khamtam ha ka rukom shna ïa ki ïing ki sem kiba katkum kane ka juk kaba mynta.
Kiwei pat kiba la ai jingkren ha kane ka sngi ki long U Deepak Mazumdar, Senior Additional Director CIDC, U T. K. Sinha, Senior Adviser CIDC, U Bah S. S. Majaw, Principal Incharge ITI, Rynjah bad U Bah A. R. Jyrwa, Employment Officer DECT. kumjuh na i Kong A. J. Nongsiej , Nodal Officer jong kane ka Training Programme i ba la pynïaid ruh ïa kane ka jingïalang pynkut ïa ka prokram.
Ka MBOCWWB ka dei ka tnat ophis treikam kaba peit na ka bynta ka bha ka miat jong ki nongtrei bylla misteri kiba la long ki dkhot jong kane ka Board ha baroh kawei ka Jylla da kaba ai jingïarap lyngba kiba bun ki skhim bala pyntreikam da kane ka Board.