Press "Enter" to skip to content

Shyrkhei ka jingpom pathar tuh ïa ki dieng na khlaw sorkar ha Garo

Balei ym shim khia ka sorkar MDA?

Shillong, Nailur 10 : Wat la ki la don bun ki jingujor na ki seng bhalang bad wat hadien ba la ïoh kem da ki bor pulit ïa ki nongtuh bad nongkhaïi dieng tuh na ki khlaw sorkar ka ri lum Garo ba ka la shyrkhei haduh katta katta kaba wat ki khlaw ki btap jong ki Reserve Forest ki la sdang ban syllen, hynrei ka sorkar MDA haduh mynta kam leh ei ei bad ka jingkylli ka long balei bad don aiu sha lyndet?
Lada thung da ka jingtohkit khlem pep kin don bun ngut ki ban hap na shuki imat na kata ka daw ba ka sorkar ka khlem leh ei ei.
Kaba dang shen eh ka jingpynkhyllem tuh ïa ki dieng ha ka khlaw sorkar ( Reserve Forest ) ka dei ha East Garo Hills ha kaba la lap ba da ki phew pew tynrai ki dieng Sal la pynkhyllem bad kaba phylla ka long ba kane ka jia ha ka jaka ba jngai tang 5 Km na ka ophis u Range Officer jong ka Rongjeng.
ïa ka dur ba la ïoh shon ïa ki dieng ba pynkhyllem beaiñ la buh ruh ha ki social media bad khlem pep kan poi sha ki shkor jong ka sorkar hynrei kaba lyngngoh ka long kat haduh kine ki sngi pat ym shym la leh ei ei da ka sorkar bad wat ban phah tohkit ruh ym shym la leh. Kane ka la pynlong ïa ki briew ban suba jur ba ka lah ban ïadon kti lang ki bor pynïaid jong ka tnad Forest ruh. Khamtam lei lei ba kane ka jingpom bad pynkhyllem ïa ki dieng ka long mynsngi mynshai.
“ Kane ka jingpom dieng pathar kan nym lah ban long da lei lei ruh lada ym dei ka jingïadon kti bad jingtip jong ki bor ka tnad Forest. Kumno kita ki bor ba dei peit kin matlah haba ka jia tang katto katne kilometer na ka ophis jongki” ong uwei u nogshong shnong u Chengsal Momin.
La ïathuh ba ka Sub Beat Office jong ka tnad Forest kaba don hapoh ka khlaw Rongjeng ka khlem plie shuh mynta da ki phew phew snem. Katei ka ophis ka don tang kumba shiteng kilimeter na ka jaka ba jia katei ka jingpynkhyllem tuh ïa ki dieng bad ïa kane la leh da ki briew na Meghalaya bad Assam.
La ïathuh ruh ba kine ki dieng ba la pom tuh la pynkit beit sha Assam. Kumno ki nongtuh kin ïoh lad ban kit tuh ïa ki dieng da kaba ïaid najan ka ophis jong ka tnad Forest lada ym dei ba ïadon kti lang ong sa uwei u nongïalam seng bhalang lang u Mukesh M Sangma.
La kynnoh ba ka jingaild ban seng ïa ka kawei ka karkhana otdieng ha Mangsang kaba hajan Rongjeng ka dei kawei na ki daw bah ba jur katei ka jingkhaïi tuh ïa ki dieng.
Ki riew paidbah na katei ka thaiñ ki la ther tyngeh ïa ka tnad Forest da kaba pynpaw ruh ba ka sorkar ka la dei ban leh ei ei shwa ban syllen lut ki khlaw sorkar ha ri lum Garo.
Namar la ïathuh ha ri lum Garo lajan baroh ki khlaw sorkar ki la jan syllen lut namar ba la jur palat ka jingpom bad die tuh ïa ki dieng na kitei ki khlaw. Namar la ong ba la ka dei na Rongrenggre Forest Reserve ne na Siju Forest Reserve ki dieng ba kyrpang bad rem dor ki la shah pynkhyllem bad shah khaïi tuh beit sha Assam hynrei ki bor pynïaid jongka tnd Forest kiba peit ha kitei ki jaka ki leh matlah bad kim ju patiaw wat haba ki paidbah ki ujor halor kane ruh.