Press "Enter" to skip to content

Thep kyrteng u Bah Metbah bad u Winnerson

Shillong: U Bah Metbah Lyngdoh, kyrtong ka MDA bad u Winnerson Sangma, kyrtong ka Congress, ki la thep kyrteng ha ka sngi ba ar na ka bynta ka elekshon Speaker ka ban long ha ka 13 tarik mynta u bnai, kaba long ka sngi ba khatduh eh jong ka dorbar synrai.
Ha shuwa jong kane, u Bah Metbah u la hiar shuki noh kum u Myntri ka sorkar jylla da kaba ai ïa ka shithi sha u Myntri Rangbah ka jylla, u Conrad Sangma ha ka por 12:30 mynsngi.
Ïa u Bah Metbah la synran da jan baroh ki MLA jong ka MDA, kynthup ïa u Myntri Rangbah, u Conrad Sangma, u Myntri Rangbah Symbud, u Bah Prestone Tynsong bad kiwei kiwei de ki MLA.
Haba ïakren bad ki nongthoh khubor, u MLA ka UDP na Mairang, u ong ba un jop da kaba suk namar ba baroh 40 ngut ki MLA ka MDA ki la ïakut ban kyrshan ïa u.
Hadien ba ladep thep u kyrtong ka MDA, la wan thep kyrteng sa u kyrtong ka Congress, u Winnerson Sangma bad la synran ïa u da ki MLA ka Congress, kynthup ïa u Nongïalam ka Liang Pyrshah, u Dr. Mukul Sangma bad kiwei kiwei.
U Winnerson, uba la ïakhun ruh ha ka elekshon Speaker ha ka por jong u Dr. Donkupar, ula ong ba wat lada ha ka jingdon briew la thikna ba un shah rem, hynrei ha ka saiñpyrthei ym lah ban tip da kaba ong ba u lah ban ïoh katto katne ki paralok na ka MDA ban kyrshan ïa u.
U Dr. Mukul, u la ong ba ka jingïaleh ïa ka elekshon Speaker wat lada ka Congress ka duna briew bha, hynrei ka long kum ka khubor sha ka sorkar ba ka hap ban treibha, namar ba ki Liang Pyrshah ki don borabor ban pyni ïa ki jingbakla bad ka jingbym lah treikam jong ka.